Azərbaycan, Bakı, 01 sentyabr / Trend , müxbir E.İsmayılov /
Bakı metropoliteni sentyabrın 20-dək "İçərişəhər" stansiyasının işinin tam bərpa edilməsini planlaşdırır. Stansiya bir müddət öncə yeni eskalatorların quraşdırılması üçün bağlanmışdı. Bu barədə çərşənbə axşamı metropolitendəki mənbədən deyilib.
"Hazırda alman istehsalı olan yeni eskalatorların işə salınması prosesi gedir. Stansiyanın 15-16 sentyabrdan tam rejimdə işləyəcəyi planlaşdırılır. Maksimum 20 sentyabrdan etibarən stansiyanın işi tam bərpa olunacaq", - mənbə deyib.
Mənbədən deyildiyi kimi, hazırda tamamlayıcı işlər, xüsusilə də stansiyanın estetik görünüşünün bərpası üzrə işlər aparılır.
"Metropolitenin aldığı, alman istehsalı olan üç eskalatorun dəyəri beş milyon dollar qiymətləndirilir", - mənbədən bildirilib.
Bakı metropoliteni 1967-ci ildən etibarən fəaliyyət göstərir ("İçərişəhər" stansiyasından "Nəriman Nərimanov" stansiyasına kimi üç aralıq stansiyası ilə). Metropolitenin yeddi stansiyası ("İçərişəhər", "Sahil", "28 May", "Cəfər Cabbarlı", "Xətai", "Nizami Gəncəvi", "Elmlər Akademiyası") dərində yerləşir, "Bakmil" yerüstü, qalanları isə sütunludur, dayazda yerləşir. İlin sonunadək Bakı metropoliteni daha bir stansiyanı - "Azadlıq prospekti" stansiyasını istifadəyə verməyi planlaşdırır.
Məqalə müəllifi ilə əlaqə ünvanı: [email protected]
