Azərbaycan, Bakı, 02 sentyabr / Trend , müxbir N.İsmayılova/
Azərbaycan İqtisadi İnkişaf Nazirliyi yanında Sahibkarlığa Kömək Milli Fondu (SKMF) ölkənin altı iqtisadi rayonunda taxıl bitkilərinin saxlanması və təmizlənməsi üçün anbar komplekslərinin yaradılması üzrə tender çərçivəsində 26 təklif alıb. Hər birinin tutumu 10 min ton olan anbarlar müasir texnologiyalar əsasında qurulmalıdır. Bu barədə çərşənbə günü tender təkliflərinin açılması zamanı fondun icraçı direktoru Şirzad Abdullayev deyib.
"Milli Fonda Aran iqtisadi rayonunun sahibkarlıq subyektlərindən 12 təklif, Dağlıq Şirvandan 2, Gəncə-Qazaxdan 3, Lənkəran rayonundan 2, Şəki-Zaqataladan 4, Yuxarı Qarabağ iqtisadi rayonundan isə 3 təklif daxil olub", - Abdullayev deyib.
Onun sözlərinə görə, daha maraqlı təklif qismən sahibkarların şəxsi vəsaitləri və Milli Fondun güzəştli kreditləri hesabına maliyyələşdiriləcək. Zərurət yarandıqda isə Azərbaycan İnvestisiya Şirkəti və ya onun törəmə strukturlarının iştirakı ola bilər. Müsabiqənin şərtlərinə əsasən, investisiya layihələri dəyərinin minimum 30 faizi sahibkarların şəxsi vəsaiti hesabına maliyyələşdirilməlidir.
Fondun aldığı investisiya təkliflərinin dəyəri 1,3-2,7 milyon manat arasındadır. Onlardan SKMF-in vəsaiti hesabına 650 mindən bir milyon manat civarında maliyyələşmənin cəlb olunması təklif edilir.
Tenderin nəticələri sentyabrın 17-də elan olunacaq.
Abdullayevin sözlərinə görə, Milli Fond gələcəkdə paket maliyyələşmə verməyə hazırdır. Kreditlər isə bu komplekslərlə çörəkbişirmə kombinatlarının və digər yardımçı təsərrüfatların inşasına ayrıla bilər.
2008-ci ildə ölkədə istehsal olunmuş 2,3 milyon ton taxıldan 89,5 faizi bu altı rayonda istehsal olunub. Proqnoza əsasən, 2009-cu ildə taxıl istehsalı 2,89 milyon ton təşkil edəcək.
Sentyabrın 02-nə olan rəsmi məzənnə 0,804 AZN/USD təşkil edir.
Məqalə müəllifi ilə əlaqə ünvanı: [email protected]
