Azərbaycan, Bakı, 14 sentyabr / Trend , müxbir, Ü.İsmayılova /
Ramiz Həsənovun başçılıq etdiyi Standartlaşdırma, Metrologiya və Patent üzrə Dövlət Komissiyasının nümayəndə heyəti Ümumdünya İntellektual Mülkiyyət Təşkilatının (WIPO) assambleyasında iştirak edəcək. Bu barədə Dövlət Komissiyasından çərşənbə axşamı yayılan məlumatda deyilir.
"Assambleya sentyabrın 22-dən oktyabrın 1-dək Cenevrədə keçiriləcək", - məlumatda bildirilir.
Tədbir çərçivəsində Həsənov təşkilatın baş direktoru Frensis Harri ilə görüşəcək. Görüşdə patent sahəsində əməkdaşlığı təkmilləşdirmək, treninq mərkəzinin yaradılması və informasiya-axtarış sisteminin avtomatlaşdırılması prosesinin başa çatması məsələləri müzakirə ediləcək. Həmçinin görüşdə WIPO-nın baş direktorunun Azərbaycana səfər imkanlarına baxılacaq.
Assambleya çərçivəsində rəhbər şəxslərin "Dünyada baş verən qlobal proseslərin tənzimlənməsində intellektual mülkiyyətin rolu" mövzusunda konfransı keçiriləcək.
Bundan əlavə, Həsənov Mərkəzi Avropa və türkdilli ölkələrin patent üzrə təşkilat rəhbərləri ilə əməkdaşlığın inkişaf perspektivləri üzrə görüşlər keçirəcək.
Məqalə müəllifi ilə əlaqə ünvanı: [email protected]