Azərbaycan, Bakı, 13 oktyabr / Trend , müxbir E.İsmayılov/
Azərbaycanın Nəqliyyat Nazirliyi Mərdəkan qəsəbəsi dairəsi - Heydər Əliyev adına hava limanı avtomobil yolunun yenidən qurulmasını ilin sonuna kimi tamamlamağı planlaşdırır. Bu barədə çərşənbə axşamı nəqliyyat naziri Ziya Məmmədov bildirib.
"Heç bir problem olmasa, Mərdəkan dairəsinə kimi olan sahədə işlərin tamamlanması bu ilin sonuna kimi nəzərdə tutulub", - Məmmədov bildirib.
Məmmədov bildirib ki, növbəti mərhələdə Mərdəkan dairəsində avtomobil yol ayrıcının inşası və istismara verilməsi planlaşdırılır, eyni zamanda Binə qəsəbəsi dairəsində yeni körpünün inşası planlaşdırılıb.
Əvvəlcə Nazirlər Kabineti Heydər Əliyev adına beynəlxalq hava limanı - Mərdəkan dairəsi - Bilgəh istiqamətində (19 km) avtomobil yolunun altızolaqlı olmaqla yenidən qurulması məqsədi ilə dövlət ehtiyacı üçün yol boyunca torpaq sahələri və digər daşınmaz əmlak obyektlərinin (binalar, evlər, tikililər, qurğular və s.) alınması barədə sərəncam verib. Qərar imzalandığı gündən - avqustun 28-dən qüvvəyə minib.
Nazirlər Kabinetinin qərarına əsasən, dövlət ehtiyacı üçün torpaq sahələrinin alınması Azərbaycan Nəqliyyat Nazirliyi tərəfindən həyata keçiriləcək. Torpaqların alınması 2009-cu il aprelin 4-də tətbiq olunmuş dövlət ehtiyacı üçün alınan mülk qiymətlərinin hesablanması qaydası əsasında müəyyənləşdiriləcək qiymətlərə uyğun həyata keçiriləcək.
Məqalə müəllifi ilə əlaqə ünvanı: [email protected]
