Bakı, Azərbaycan, 14 oktyabr / Trend , müxbir N.İsmayılova/
"Azərbaycan Beynəlxalq Bankı islam bankinqinin təcrübəsini istifadə etmək və onun xidmət spektrini əhaliyə təqdim etmək niyyətindədir", - bankın İdarə Heyətinin sədri Cahangir Hacıyev deyib.
"Dünya böhranı şəraitində islam bankinqinə maraq artmağa başlayıb. Azərbaycanda bir sıra kommersiya banklarında islam bankinqinin başlanğıcı var, buna görə də bizim əsas ideyamız islam bankinqinin Azərbaycana gətirilməsi və bu xidmətlərin yerli əhaliyə təqdim edilməsidir", - Hacıyev MDB iştirakçı dövlətlərinin "MDB-nin maliyyə bank sisteminin dayanıqlılığının yüksəldilməsi" mövzusunda II Beynəlxalq Bank Konfransında deyib.
Onun sözlərinə görə, hazırda Qətər maliyyə mərkəzi ilə bu istiqamətdə danışıqlar aparılır. 2010-cu ildə bank Qətərdə öz nümayəndəliyini açmağı planlaşdırır, həmin vaxtda da islam bankinqinin praktikasından istifadə ediləcək.
Hacıyev deyib ki, İslam İnkişaf Bankı ilə razılıq çərçivəsində danışıqlar aparılacaq. Ola bilsin ki, bu razılıq artıq 2009-cu ilin sonunadək ABB üçün "İslam pəncərəsi" açacaq.
"İslam pəncərəsi" adi çərçivədə islam bank xidmətlərinin təqdim edilməsidir və özünəməxsus xüsusiyyətlərə malikdir.
TREND və Day.az informasiya agentlikləri Beynəlxalq Bank Konfransına informasiya dəstəyi göstərir.
