Azərbaycan, Bakı, 19 oktyabr / Trend , müxbir Ü.İsmayılova/
Azərbaycan iqtisadiyyatına qlobal maliyyə böhranı güclü təsir etməyib. Bu barədə bazar ertəsi Qara dəniz İqtisadi Əməkdaşlıq Təşkilatının (QDİƏT) Biznes Şurasının XXXⅦI iclası zamanı ölkənin Nazirlər Kabinetinin iqtisadi, maliyyə-kredit siyasəti şöbəsinin rəisi Şahin Sadıqov bildirib.
"Azərbaycan iqtisadiyyatı bir çox beynəlxalq institutlar tərəfindən uğurlu iqtisadiyyat kimi qəbul olunur", - Sadıqov bildirib.
Onun sözlərinə görə, Azərbaycan hökuməti xüsusilə də qeyri-neft sahəsində, iqtisadiyyatın diversifikasiyası və rəqabətin artırılması istiqamətində bir çox böhrana qarşı tədbirlər həyata keçirib.
"Yeni texnologiyaların cəlb olunması və innovasiya iqtisadiyyatının yaradılması müsbət nəticələrə gətirib çıxarıb", - Sadıqov deyib.
Şöbə müdiri bildirib ki, Azərbaycanın makroiqtisadi siyasəti bir çox ölkələr üçün nümunə ola bilər.
"Hesab edirəm ki, Azərbaycanın pul siyasəti, büdcə siyasəti ölkəyə qlobal maliyyə böhranının təsiri minimuma endirməyə imkan verib", - Sadıqov bildirib.
Azərbaycanın sahibkarları ilə QDİƏT ölkələri arasında qarşılıqlı əlaqələrdən danışarkən Sadıqov deyib ki, hazırda ölkələr arasında ciddi diplomatik, iqtisadi və siyasi münasibətlər inkişaf edir.
"Mövcud problemlərin həlli məqsədi ilə QDİƏT ölkələri bir-birinin problemlərinə biganə qalmamalıdırlar", - Sadıqov bildirib.
QDİƏT-in Biznes Şurasına 12 ölkənin təşkilatda təmsil olunan biznes-qurumları daxildir. Azərbaycan noyabrın 1-dək təşkilatın Biznes Şurasına sədrlik edəcək.
Məqalə müəllifi ilə əlaqə ünvanı: [email protected]
