Azərbaycan, Bakı, 23 noyabr / Trend /
Sumqayıt şəhərindəki yaşayış binalarında liftlərin bərpasına dair işlər çərçivəsində bu il ərzində 82 lift cari təmir olunub. Bu barədə şəhərin icra hakimiyyətinin bazar ertəsi yayılmış məlumatında deyilir.
Şəhər "Lift-Servis" Birliyi tərəfindən yaşayış binalarında 565, səhiyyə müəssisələrində isə 14 liftə texniki qulluq göstərilib, həmçinin 3 yeni lift quraşdırılaraq sakinlərin istifadəsinə verilib.
Sumqayıt şəhərində mövcud olan 586 liftdən 562-si (96 faiz) istismardadır.
Sumqayıt şəhərinin 60 illiyi ilə bağlı yubiley tədbirləri ilə əlaqədar olaraq, şəhərin yaşayış binalarında 15 yeni liftin quraşdırılması, istismar müddəti ötmüş 15 liftin yenisi ilə əvəz edilməsi və istismarda olan 85 liftin əsaslı, 110 liftin isə cari təmiri nəzərdə tutulub.
