Azərbaycan, Bakı, 11 fevral / Trend , müxbir Ü.İsmayılova/
Azərbaycanın Auditorlar Palatası auditin aparılmasının dörd yeni standartını hazırlayır. Bu barədə Auditorlar Palatasının rəhbəri Vahid Novruzov cümə axşamı deyib.
"Palata, xüsusilə də təhsil, həmçinin kiçik və orta müəssisələr sahəsində audit aparmaq üçün standartlar hazırlayır", - Novruzov deyib.
Onun sözlərinə görə, yeni standartlar auditin beynəlxalq standartları bazasında hazırlanacaq.
Azərbaycanda 2010-cu il yanvarın 1-dən auditin beynəlxalq standartları tətbiq olunub. Dekabrın 25-də Auditorlar Palatası auditin beynəlxalq standartlarının Azərbaycan dilində nəşr edildiyi kitabın təqdimatını keçirib.
Azərbaycanda auditin beynəlxalq standartlarının tətbiq edilməsi dörd mərhələdə həyata keçiriləcək. Birinci mərhələdə hüquq bazasının təkmilləşdirilməsi, ikinci mərhələdə normativ bazanın təkmilləşdirilməsi, üçüncü mərhələdə kadrların hazırlanması və dördüncü mərhələdə beynəlxalq standartlara əsasən keyfiyyətə nəzarət həyata keçiriləcək.
Azərbaycanın Auditorlar Palatası 1995-ci ilin sentyabrında yaradılıb və 1996-cı ilin aprelindən fəaliyyətə başlayıb. "Auditor fəaliyyəti haqqında" Azərbaycan Respublikasının Qanunu 1994-cü ildə qəbul edilib.
Məqalə müəllifi ilə əlaqə ünvanı: [email protected]
