Azərbaycan, Bakı, 24 fevral / Trend , müxbir Ü.İsmayılova/
Son 15 ildə müstəqil Azərbaycanda aparılan siyasət islahatların və inkişafın Azərbaycan modelinin yaranmasından xəbər verir. Bu barədə Ali Audit Qurumlarının Beynəlxalq Təşkilatının Məşvərət Şurasının üzvü, sabiq iqtisadiyyat naziri və Hesablama Palatasının sədri Namiq Nəsrullayev "Xalq" qəzetinə müsahibəsində bildirib.
"Azərbaycan modelinin bir neçə xüsusiyyəti var və bu gün ölkədə fəaliyyət göstərən müxtəlif elmi tədqiqat institutları öz işlərini məhz Azərbaycan modeli əsasında qurmalıdır", - Nəsrullayev deyib.
Onun sözlərinə görə, bununla da hazırda özünü inamla doğruldan və təsdiq edən Azərbaycan modelini daha da inkişaf etdirmək, zənginləşdirmək olar.
"Hazırda bu istiqamətdə çox böyük uğurlarımız var və Xəzərin karbohidrogen ehtiyatlarından istifadə olunması bunu əyani şəkildə təsdiqləyir. Əlverişli coğrafi mövqedə yerləşən Azərbaycanın tranzit ölkə olması da ümumi inkişafa təkan verən amillərdəndir", - Nəsrullayev deyib.
Azərbaycanın inkişafına imkan yaradan amillərdən biri də ölkədə torpaq islahatının uğurla həyata keçirilməsi ilə bağlıdır ki, bunun nəticəsində də əhalinin inamını qazanmaq mümkün olub.
"İnsanlar inandılar ki, bu proses davamlı olacaq, bununla da onlarda sahibkarlıq hissi formalaşdı", - Nəsrullayev deyib.
İnkişafın Azərbaycan modelinin ikinci xüsusiyyəti isə ardıcıl, liberal, demokratik iqtisadiyyata keçilməsi ilə bağlıdır. "Və bu məsələdə Azərbaycanın sadalanması vacib olan spesifik özəllikləri çoxdur. Digər bir məsələ isə Azərbaycanın dünya təsərrüfat sisteminə inteqrasiyası ilə bağlıdır", - Nəsrullayev deyib.
