Azərbaycan, Bakı, 25 fevral / Trend , E.Ostapenko/
Avropa Komissiyası 2010-2011-ci illərdə tvininq-layihə çərçivəsində Azərbaycanda gigiyena və təhlükəsizlik sahəsində Dövlət Əmək Müfəttişliyinin dəstəklənməsi üçün bir milyon avro ayırmağa hazır olduğunu bildirib. Bu barədə Avropa İttifaqının ENP (Avropa Qonşuluq Siyasəti) informasiya mərkəzinin cümə axşamı yaydığı məlumatda bildirilir. Dövlət Əmək Müfəttişliyi Azərbaycan Əmək və Əhalinin Sosial Müdafiəsi Nazirliyinin nəzdində fəaliyyət göstərir.
Layihə Azərbaycanda sosial müdafiənin gücləndirilməsi məqsədilə qanunvericiliyin təkmilləşdirilməsi üzərində nəzarəti nəzərdə tutur.
Layihə çərçivəsində gigiyena və əməyin təhlükəsizliyinin idarə olunması sisteminə dair tövsiyələr, həmçinin sanitar-gigiyena müfəttişliyinə nəzarət üçün göstəricilər hazırlanacaq.
Həmçinin layihə çərçivəsində gigiyena və əməyin təhlükəsizliyi üzrə prosedurlar hazırlanacaq, yerlərdə təftiş üçün texniki tələbat müəyyən ediləcək, həmçinin əmək şəraitinə nəzarət üzrə müfəttişlər üçün treninqlər təşkil olunacaq. Bundan əlavə, layihə əməyin mühafizəsi sahəsində səmərəli kommunikasiya alətlərinin hazırlanmasına yardım göstərəcək.
Tvininq-proqram Avropa İttifaqının təşşəbbüsüdür. Proqram Aİ qanunvericiliyinin qəbulunda və reallaşmasında zəruri bacarıq və təcrübənin əldə olunması üçün namizəd ölkələrə yardım göstərilməsi məqsədilə hazırlanıb. 2004-cü ildən tvininq-layihə Avropa Qonşuluq Siyasəti ölkələrinə də şamil edilir. Bu layihələr əməkdaşlığın möhkəmləndirilməsi məqsədilə icbari qaydada Aİ ölkələrində sosial sektorun ekspertizasını və tərəfdaş ölkələri birləşdirir.
2006-cı ildə Brüsseldə təsdiqlənmiş Azərbaycan üçün ENP proqramının prioritet fəaliyyət istiqamətləri bunlardır: ölkədə demokratiyanın möhkəmləndirilməsi, işgüzar və investisiya mühitinin yaxşılaşdırılması, davamlı iqtisadi inkişafın dəstəklənməsi, iqtisadi sahədə qanunvericiliyin təkmilləşdirilməsi, Aİ və Azərbaycan Respublikası arasında enerji və nəqliyyat, regional əməkdaşlıq, sərhəd idarəetməsi sahələrində əməkdaşlığın möhkəmləndirilməsi.
