Azərbaycan, Bakı, 29 mart / Trend , müxbir N.İsmayılova/
2009-cu il ərzində Azərbaycan manatının ABŞ dollarına nisbətdə məzənnəsi 0,29 faiz ucuzlaşıb. Bu barədə Azərbaycan Mərkəzi Bankının 2009-cu ilin yekunları üzrə maliyyə sabitliyinə dair hesabatında bildirilir.
"Ötən il ölkənin valyuta bazarı beynəlxalq bazarda əlverişsiz qiymət konyunkturası, bank sisteminin xarici borcların qaytarılması üzrə xərclərinin artırılması və qonşu ölkələrdə müşahidə olunan devalvasiya kimi amillər tərəfindən təzyiqə məruz qalıb", - hesabatda deyilir.
Lakin bu amillər AMB-nin məqsədyönlü müdaxiləsi nəticəsində neytrallaşdırılıb və il ərzində milli valyutanın stabil məzənnəsi saxlanılıb. Manatın məzənnəsinə təzyiqin gərgin vaxtı ötən ilin yanvar-mart aylarında müşahidə olunub. Nəticədə valyuta bazarında AMB tərəfindən xalis satış 1,26 milyard dollar təşkil edib. Bunun bir milyard dolları birinci rübün payına düşüb.
2009-cu ildə daxili valyuta bazarı iştirakçılarının fəallığı yüksək səviyyədə olub və bazarda əməliyyatların həcmi 31,8 milyard dollar təşkil edib.
2009-cu ildə banklar və müştərilər arasındakı (valyuta bazarının birjadankənar seqmenti) əməliyatlarda 15 faizlik azalmanın müşahidə olunmasına baxmayaraq, banklararası seqmentdə (birja) 41 faiz artım müşahidə olunub ki, bu da azalmanı kompensasiya edib.
"Beləliklə, AMB-nin məzənnə siyasəti dövlət antiböhran siyasətinin özəyi olub və ölkədə maliyyə sabitliyinin saxlanmasına imkan yaradıb", - hesabatda deyilir.