Azərbaycan, Bakı, 5 aprel /Trend/
AccessBank kreditlər üzrə 1 milyard dollar həddini keçdiyini elan etdi. Bu barədə bankın məlumatında bildirilir.
2002-ci ildə fəaliyyətə başladığı gündən bank 175 mindən artıq müştəriyə 300 min kredit verib. Bu məbləğin 90%-dən artıq hissəsi biznesin genişləndirilməsi məqsədilə verilib, bununla da AccessBank Azərbaycan iqtisadiyyatının inkişafına və yeni iş yerlərinin açılmasına əhəmiyyətli yardım göstərir. AccessBank regionlarda kənd təsərrüfatının inkişafına xüsusi diqqət ayırır - hal-hazırda verilən biznes kreditlərinin 1/3 hissəsi aqrokreditlərin payına düşür.
"Biz davamlı olaraq Azərbaycanda, xüsusilə də ölkənin bölgələrində biznesin inkişafına dəstək göstəririk. AccessBank-dan alınmış kreditlər sayəsində on minlərlə yerli biznes inkişaf edir, yeni iş yerləri açılır və əhalinin ümumi gəliri artır",- AccessBank İdarə Heyətinin sədri Andrü Pospilovski bildirib.
AccessBank-ın missiyası Azərbaycan ailələrini, mikro və kiçik biznes sahələrini maliyyə xidməti ilə təmin etməkdir. AccessBank beynəlxalq Fitch reytinq agentliyi tərəfindən Azərbaycan bankları arasında ən etibarlı bank təsdiq edilən (uzunmüddətli DER BB+ və fərdi reytinq D səviyyəsində) və 100% xarici 6 beynəlxalq maliyyə institutuna məxsusdur. Bunlar Avropa Yenidənqurma və İnkişaf Bankı, Beynəlxalq Maliyyə Korporasiyası, Qara Dəniz Ticarət və İnkişaf Bankı, Kfw Development Bank - Almaniya Hökumətinin İnkişaf Bankı (hərəsi 20%), mikromaliyyələşdirmə sahəsində strateji maliyyəçi rolunda çıxış edən AccessHolding (16.5%) və Almaniyanın LFS Financial Systems GmbH (3.5%) şirkətləridir.
