Azərbaycan, Bakı, 3 may /Trend, müxbir N.İsmayılova/
İqtisadi İnkişaf Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidmətinin keçirdiyi növbəti monitorinqlər zamanı 1,6 tondan çox saxlama müddəti ötmüş ərzaq məhsulları aşkar olunmuş, satışdan çıxarılıb məhv edilmişdir. Bu barədə nazirliyin bazar ertəsi yayılan məlumatında deyilir.
Monitorinqlər Bakı şəhərinin Nəsimi, Binəqədi, Yasamal və Abşeron rayonunda, həmçinin, Gəncə və Quba şəhərlərində keçirilib.
Ticarət obyektlərindən qənnadı məhsulları, kolbasa, süd məhsulları, un məmulatları, konservləşdirilmiş məhsullar, yağlar, sərinləşdirici içkilər, meyvə şirələri, pivə və s. saxlama müddəti ötmüş məhsullar aşkar olunub.
Qanun pozuntusuna yol vermiş şəxslər barəsində Azərbaycan Respublikası İnzibati Xətalar Məcəlləsinə uyğun olaraq inzibati tədbirlər görüləcək.
İstehlakçılardan istifadə müddəti ötmüş, keyfiyyətsiz malların satışı halları ilə rastlaşdıqda 498-15-01 və 498-15-04 nömrəli telefonlarla Antiinhisar Siyasəti və İstehlakçıların Hüquqlarının Müdafiəsi Dövlət Xidmətinə məlumat vermələri xahiş olunur.
