Azərbaycan, Bakı, 14 may /Trend/
Bakı - Tbilisi - Qars (BTQ) dəmir yolunun inşası layihəsinin realizəsi sürətləndirilməllidir. Bu barədə Azərbaycan Nəqliyyat Nazirliyinin məlumatında nəqliyyat nazirinin müavini Musa Pənahova istinadən bildirilir.
Pənahovun sözlərinə görə, layihənin realizəsi ilə bağlı problem yoxdur, bir az əvvəl dayandırılan tikinti işləri tam bərpa edilib.
Gürcüstanın Türkiyə ilə sərhədindəki tikinti işləri bir qədər əvvəl əlverişsiz hava şəraiti ilə əlaqədar dayandırılmışdı.
Bundan əvvəl "Azərbaycan Dəmir Yolları" QSC-dəki mənbənin sözlərinə görə, texnikanın cəmləşdirilməsi işləri artıq həyata keçirilib və dəmir yolunun Marabda - Axalkalaki hissəsinin bərpası üzrə işlərə artıq başlanılıb. Burada tenderin qalibləri olan Gürcüstan şirkəti "Azərtikintiservis" şirkəti birgə çalışır. Şirkətlər artıq mövcud olan 160 kilometrlik dəmir yolunun bərpası üzərində də çalışacaqlar.
BTQ-nin inşası üzrə işlərin 2011-ci ilin sonlarında başa çatdırılması planlaşdırılıb.
Layihə çərçivəsində Gürcüstan ərazisindəki Axalkalaki dəmiryol stansiyasının inşası üzrə tenderin qalibi artıq müəyyən edilib. Tenderin qalibi Azərbaycanın "Kontur" Layihə-Sənaye Memarlıq Şirkəti olub.
Axalkalaki stansiyasının inşasına 2010-cu ildə başlanılması və 2011-ci ildə başa çatdırılması planlaşdırılır.
Bakı - Tbilisi - Qars layihəsi çərçivəsində dəmir yolu magistralının yeni 105 km-lik qolunun tikintisi də planlaşdırılır. Bunun 76 km-i Türkiyə, 29 km-i isə Gürcüstan ərazisindən keçəcək. Bundan əlavə, nəqletmə gücünü ildə 15 mln ton yükə çatdırmaq üçün Gürcüstanda 183 km-lik Axalkalaki - Marabda - Tbilisi dəmir yolunun 183 km-lik hissəsi yenidən qurulacaq. Axalkalakidə Gürcüstanda mövcud olan dəmir yolu xətlərinin Avropa standartlarına uyğunlaşdırılması üzrə məntəqələrin tikilməsi də planlaşdırılır.