Azərbaycan, Bakı, 17 may /Trend, müxbir E.İsmayılov/
İslandiyada püskürən Eyyafyatlayokuld vulkanından qalxan yeni kül buludu ilə əlaqədar Böyük Britaniyada hava limanlarının bağlanması səbəbindən Bakı - London aviareysi təxirə salınıb. Bu barədə "Azərbaycan Hava Yolları" QSC-dən (AZAL) məlumat verilib.
AZAL-dan bildiriblər ki, Bakıdan yerli vaxtda 12:55-də uçmalı olan aviareysin vaxtı saat 15:00-ə keçirilib.
London - Bakı reysinin təyin olunduğu məntəqəyə müvafiq olaraq cədvəl üzrə Bakı vaxtı ilə saat 22:50-də çatacağı gözlənilir.
Bazar günü, mayın 16-da axşam Böyük Britaniyanın cənubunda aeroport bağlanıb. İngiltərənin şimal və mərkəzi hissəsindəki, eləcə də Şotlandiya və Şimali İrlandiyadakı aeroportlar da işləmir.
Mayın 17-də Bakı vaxtı ilə səhər saat 5-dən 11-dək "Hitrou" və "Qatvik" də daxil olmaqla, London aeroportları bağlanıb.
Bazar günü Dublin aeroportu da daxil olmaqla, İrlandiyadakı hava limanları da bağlanıb. O, ən azı, bazar ertəsi günortayadək bağlı olacaq.