Аzərbaycan, Bakı, 22 may /Trend, müxbir E.İsmayılov/
Mayın 27-də TRACECA nəqliyyat dəhlizinin milli katibləri (Avropa-Qafqaz-Asiya) Antalyada (Türkiyə) dəhlizin Azərbaycandan keçən mərkəzi marşrutu çərçivəsində tariflər üzrə protokol imzalayacaqlar, - bu barədə şənbə günü TRACECA-nın Azərbaycandan olan milli katibi Akif Mustafayev deyib.
Onun sözlərinə görə, fevral ayında Sofiyada təşkil olunmuş iclasda TRACECA-ya üzv ölkələrin tariflər üzrə işçi qrupu tərəflərin qəti qərara gələ bilmədikləri səbəbinə görə, protokolu imzalamağa nail olmamışdılar. Lakin indi bu barədə bütün məsələlər dəqiqləşdirilib və tərəflər qarşılıqlı razılaşma əldə ediblər. Sənədin imzalanmasında iştirakçı ölkələrin nəqliyyat və iqtisadi strukturları, xüsusilə də Azərbaycan Dövlət Xəzər Gəmiçiliyi və "Azərbaycan dəmir yolları"nın nümayəndələri iştirak edəcəklər.
Həmçinin, Mustafayevin sözlərinə görə, mayın 25-26-da digər nəqliyyat dəhlizləri ilə müqayisədə TRACECA-nın rəqabət qabilliyəti üzrə iclas keçiriləcək. İclasda Azərbaycanın nəqliyyat və iqtisadi inkişaf nazirlikləri də iştirak edəcək.