Azərbaycan, Bakı, 1 iyun / Trend , müxbir Ü.İsmayılova/
2010-cu ilin aprel ayında Bakının ilkin daşınmaz əmlak bazarında bir kvadratmetr mənzilin qiyməti dəyişməyərək, mart ayındakı 880 dollar səviyyəsində qalıb. Bu barədə çərşənbə axşamı "Əmlak Bazarı İştirakçıları" İctimai Birliyindən məlumat verilib.
Apreldə tikilən yenitikililərdə mənzilin orta sahəsi mart ayındakı 121,9 kvadratmetrə qarşı 122,2 kvadratmetr təşkil edib.
Apreldə yenitikililərdə orta mərtəbə göstəricisi 15,2, tikilməkdə olan binalardakı bloklar isə 2,5 təşkil edib.
Bakının ilkin mənzil bazarı portfelinin böyük hissəsini Yasamal (27,4 faiz), Xətai (20,8 faiz) və Nəsimi (17,4 faiz) rayonlarındakı tikililər təşkil edib. Bu tikililər bazarın ümumi portfelinin 65,6%-ni təşkil edib. Binəqədi rayonunun payı 11, Nizami 6,2, Səbail 4,3 faiz təşkil edib.
Apreldə tikilməkdə olan binaların sayı martdakı 434-ə qarşı 438, tikinti şirkətlərinin sayı isə 150-dən 152-dək artıb.
