Azərbaycan, Bakı, 10 iyun /Trend, müxbir S.Ağayeva/
Azərbaycan və Yunanıstan qanunvericilik bazasını genişləndirməyi planlaşdırır. Uğurlu iqtisadi əməkdaşlıq üçün əlverişli qanunvericilik bazası lazımdır. Bunu Azərbaycanın Yunanıstandakı səfiri Rəhman Mustafayev deyib.
"Hazırda Azərbaycan tərəfi mədəniyyət, elm, təhsil, turizm, gənclər və idman siyasəti sahələrində əməkdaşlıq üzrə üçillik proqramı nəzərdən keçirməkdədir. Proqram hökumətlərarası razılaşmaya əlavədir. Azərbaycan tərəfi proqramı bəyənəndən və təsdiq edəndən sonra biz humanitar sahədə əməkdaşlığın yeni mərhələsini işə sala bilərik", - diplomat Afinada azərbaycanlı jurnalistlərə bildirib.
Hazırda iki ölkə arasında 20-dən çox razılaşma imzalanıb və əlbəttə ki, hər iki ölkə üçün bu sənədlərin necə işləməsi çox vacibdir", - səfir qeyd edib.
Onun sözlərinə görə, payızda Bakıda iqtisadi əməkdaşlıq üzrə hökumətlərarası iclasın keçirilməsi də planlaşdırılır. "Bizim artıq qarşılıqlı maraq doğuran layihə və təşəbbüslərimiz var. Onlara komissiyanın iclası keçirilən zaman baxılacaq", - o deyib.
İyunun sonunda Afinada "Aralıq dənizinin nefti və qazı" mövzusunda beynəlxalq konfrans keçiriləcək. "Konfransa ARDNŞ və Sənaye və Energetika Nazirliyinin rəhbərləri dəvət olunub. Yunanıstanın energetika naziri azərbaycanlı həmkarı Natiq Əliyevlə görüşməkdə maraqlıdır. Səfər zamanı Əliyev çox güman ki, onunla görüşəcək", - Mustafayev qeyd edib.
Diplomat təəssüf hissi ilə qeyd edib ki, mövcud mal dövriyyəsinin həcmi potensiala uyğun deyil. "Hazırda mal dövriyyəsi o qədər də yüksək səviyyədə deyil. Azərbaycan Dövlət Statistika Komitəsinin 2009-cu il üzrə məlumatına görə, bu, 170 milyon dollar təşkil edib. Yunanıstan isə 17 milyon avro göstərib. Rəqəmlərdəki böyük fərq bizim yunan şirkətlərinə satdığımız neftin onların daxili istifadə üçün deyil, həm də bizdən alaraq satmaları ilə bağlıdır", - səfir vurğulayıb.
Onun sözlərinə görə, yunan sahibkarların Azərbaycana aqrar sahə üçün texnologiyalar tədarük etməyə böyük maraqları da var.