Azərbaycan, Bakı, 24 iyun /Trend, müxbir T.Cəfərov/
İran Azərbaycana sığorta və birja sektoruna sərmayələrin yatırılması üçün birgə müəssisə yaratmağı təklif edib. Bu barədə cümə axşamı Bakıda səfərdə olan İranın iqtisadiyyat və maliyyə naziri Seyid Şəmsəddin Hüseyni bildirib.
"İranlı podratçıların Azərbaycanda tikinti podratlarında iştirak etməsi ilə bağlı təkliflər də var", - nazir qeyd edib.
Hüseyni gələcək şirkətin fəalyyəti və güman edilən sərmayə yatırımı ilə bağlı ətraflı məlumat verməyib.
Onun sözlərinə görə, iki ölkə arasındakı hazırkı mal dövriyyəsi mövcud potensiala cavab vermir və İran bunu 500 milyon dollardan 10 milyard dollaradək artırmağı planlaşdırır.
"İran kənd təsərrüfatı sahəsində böyük potensiala malikdir. Biz Azərbaycanı sadələşdirilmiş prosedur formasında zəruri kənd təsərrüfatı malları ilə təmin etməyə hazırıq", - nazir vurğulayıb.