Azərbaycan, Bakı, 9 avqust /Trend, müxbir N.İsmayılova/
"Bank Melli İran"ın Bakı filialı bankda müsbət kredit tarixi olan müştərilər üçün kreditləşmə limitlərini artırıb. Bu barədə bazar ertəsi bank filialının direktor müavini Anar İbrahimov deyib.
"Bankın baş ofisi Bakı filialının gəlirinin çoxalması məqsədilə limitlərin artırılması barədə qərar qəbul edib. Bununla əlaqədar bir az öncə bankın kapitallaşdırılması gücləndirilib", - İbrahimov qeyd edib.
Bankın nizamnamə kapitalı 10 milyon manatdan 14 milyon manata artırılıb.
İstehlak kreditləri üzrə limitlər 10 min dollardan 50 min dollaradək, biznes-kreditlər üzrə 50 min dollardan 150 min dollaradək artırılıb. Bundan başqa, bankda depoziti olan müştərilər üçün kredit limiti 250 min dollardan 400 min dollaradək artırılıb.
Onun sözlərinə görə, bu günədək bank 23 faiz dərəcəsi ilə üç il müddətinədək kredit verir.
Bank avtomobil alışı üzrə ilkin ödəniş üçün kreditlər də verir. Bu, iki il müddətinə, illik 26 faiz dərəcəsi ilə 30 faizə bərabərdir. Kreditin maksimal məbləği 10 min dollar təşkil edir.
Hazırda bankın kredit portfeli 10,487 milyon manat təşkil edir.
Avqustun 9-na cari məzənnə 0,8034 AZN/USD təşkil edir.