Azərbaycan, Bakı, 17 avqust /Trend, müxbir S.Süleymanov/
Rusiya taxılının ixracına qoyulan qadağa ilə əlaqədar, Qazaxıstan Cənubi Qafqaza öz taxıl tədarükünü 800 min tondan iki milyon tonadək artıra bilər. Bu barədə çərşənbə axşamı "Prodkorporasiya" SC-nin kommersiya məsələləri üzrə idarəedici direktoru Daulet Uvaşev deyib.
Böyük taxıl istehsalçıları Rusiya və Ukraynadan taxılın ixracına qoyulan qadağa ilə əlaqədar, cari ildə Qazaxıstan Cənubi Qafqaza öz taxıl tədarükünü, təxminən, 2 milyon tonadək artıra bilər", - Uvaşev qeyd edib.
Onun sözlərinə görə, Qazaxıstandan hər il ənənəvi olaraq Bakı istiqamətində Azərbaycan və Gürcüstan üçün tədarükün həcmi 800 min ton olub.
"Bu il Azərbaycanın taxıl tələbatı 1,2-1,3 milyon, Gürcüstanın isə təxminən, 800 min tondur. Bu həcmi Qazaxıstan qonşu Rusiya və Ukraynadan tədarükün məhdudlaşdırılacağı şəraitində sakitcə ödəyə bilər", - Uvaşev qeyd edib.
Onun fikrincə, Qazaxıstan belə vəziyyətdən istifadə etməyəcəyi təqdirdə, Zaqafqaziya respublikaları başqa tədarükçüləri axtaracaqlar.
O xatırladıb ki, Qafqaz istiqamətində taxıl Bakıya iki yolla - Aktau limanından dənizlə və dəmir yolu vasitəsilə çatdırılır.
Rəsmi məlumatlara görə, cari marketinq ilində Qazaxıstanın ixrac potensialı 8 milyon ton taxıl təşkil edəcək. Gözlənilən məhsuldarlıq, ötənilki məhsulun qalığı nəzərə alınmaqla, 14-15 milyon səviyyəsində olacaq.
