Azərbaycan, Bakı, 19 avqust / Trend , müxbir N.İsmayılova/
2010-cu il avqustun 1-də "Texnikabank"ın aktivləri iyul ayı ərzində iki faiz artaraq 461,8 milyon manat təşkil edib. Bu barədə cümə axşamı bankdan məlumat verilib. Aktivlər üzrə gəlirlilik (ROA) 0,4 faiz, kapital üzrə isə (ROE) - 3,07 faiz təşkil edib.
Bankın nizamnamə kapitalı 53,685 milyon manat, ümumi kapitalı isə 57,319 milyon manat təşkil edib.
Hesabat dövrünün sonunda bankın depozit portfeli iyulda 7,3 faiz artaraq 200,8 milyon manat, həmçinin, fiziki şəxslərin əmanətləri 119,84 milyon manat olub. Bankın ümumi öhdəlikləri 386,85 milyon manat təşkil edib.
Bankın kredit portfeli 8,6 faiz artaraq 347,59 milyon manat olub. Burada bankın problemli kreditlərinin payı (ödəniş vaxtı 90 gündən çox ötən) 5,15 faizə (16,94 milyon manat) çatır. "Texnikabank" 36,572 milyon manatlıq istehlak krediti verib.
Hesabat dövründə bankın gəlirləri 37,288 milyon manat, eləcə də faiz gəlirləri 28,58 milyon manat, qeyri-faiz gəlirləri 8,7 milyon manat, xərcləri 35,44 milyon manat təşkil edib.
Avqustun 1-nə olan vəziyyətə görə, bankın xalis mənfəəti 1,843 milyon manat olub.
Avqustun əvvəlində bankın aktiv plastik kartlarının sayı 41 518 ədəd təşkil edib."Texnikabank" 58 bankomat, 278 POS-terminal quraşdırıb. Bank 35 filiala və beş şöbəyə malikdir.
"Texnikabank" bank bazarında 1993-cü ildən fəaliyyət göstərir və 2007-ci ilədək 100 faiz Azərbaycan bankı olub.
Bu gün bankın majoritar səhmdarı səhmlərin 75 faizinə sahib olan "World Wines" şirkətidir. Bankın Müşahidə Şurasının sədri Etibar Əliyev səhmlərin 15 faizinə, Amerikanın "Kazimir Investment Caspian Fund" şirkəti isə 10 faizinə nəzarət edir.
Avqustun 19-na rəsmi məzənnə 0,8038 AZN/USD təşkil edir.