Azərbaycan, Bakı, 30 avqust /Trend, müxbir N.İsmayılova/
Azərbaycan Mərkəzi Bankı (AMB) yerli bankların üzləşdikləri likvidliyin çatışmazlığı və aktivlərin keyfiyyətinin pisləşməsi ilə mübarizədə qabaqlayıcı tədbirlər qəbul etməklə özünün böhranlı vəziyyətlərin öhdəsindən gəlmək bacarığını nümayiş etdirdi. Bu barədə ölkə iqtisadiyyatını araşdıran "Moody's Investors Service Ltd"nin Trend agentliyinin redaksiyasında olan hesabatında deyilir.
Hesabatda deyildiyi kimi, bu tədbirlərdə ümumi məqsəd likvidliyin verilməsi, o cümlədən bank sisteminin xarici borcların təkrar maliyyələşdirilməsi üçün zəruri vəsaitə malik olması, əmanətçilərin müdafiə olunması, kredit risklərinin azaldılması, eləcə də iqtisadiyyatda kreditləşmənin səviyyəsinin saxlanmasıdır.
"Bu tədbirlər qısamüddətli perspektivdə banklara böhrana davam gətirməkdə kömək etdi. Biz hesab edirik ki, uzunmüddətli perspektivdə bank sektorunun sabitliyinin təmin edilməsi məqsədilə, məsələn, xarici valyutanın təsirinin məhdudlaşdırılmasına dair qaydalar üzrə qanunvericiliyin daha da hərtərəfli təkmilləşdirilməsi lazımdır", - hesabatda deyilir.
"Moody's"in fikrincə, AMB 2010-cu ildə likvidliyin saxlanması ilə bağlı tədbirlərdən imtina etmir. AMB bankların iqtisadiyyatın real sektorunun kreditləşdirilməsi üçün kifayət qədər likvidliyə malik olduqlarına əmin olmalıdır. Beləliklə, AMB-nin təqdim etdiyi likvidliyi banklar alternativ maliyyə mənbələri ilə əvəz etməyincə, Mərkəzi Bank bank sektorunu dəstəkləməkdən imtina etməyəcək.
