...

Azərbaycan əməkdaşlıq sahəsindən kənar ölkələrin yeni siyahısını müəyyənləşdirib

Biznes və iqtisadiyyat xəbərləri Materials 7 Sentyabr 2010 20:25 (UTC +04:00)

Azərbaycan, Bakı, 7 sentyabr /Trend, müxbir N.İsmayılova/

Azərbaycan Mərkəzi Bankı yanında Maliyyə Monitorinqi Xidməti cinayət yolu ilə əldə edilmiş pul vəsaitlərinin və ya digər əmlakın leqallaşdırılmasında, terrorçuluğun maliyyələşdirilməsində, transmilli mütəşəkkil cinayətkarlığın, habelə silahlı separatizm, ekstremizm və muzdluluğun dəstəkləməsində, narkotik vasitələrin və ya psixotrop maddələrin qanunsuz dövriyyəsində iştirakı ehtimal olunan, maliyyə əməliyyatlarının aparılması zamanı eyniləşdirmə məlumatlarının açıqlanması tələb olunmayan dövlətlərin yeni siyahısını təsdiq edib. Bu barədə çərşənbə axşamı xidmətdən bildiriblər.

Nazirlər Kabinetinin sözügedən qərarı ilə təsdiq edilmiş qaydalara görə Əməkdaşlıq etməyən ölkələrin Siyahısı Xarici İşlər Nazirliyi ilə razılaşdırılmaqla Maliyyə Monitorinqi Xidməti tərəfindən hazırlanır və təsdiq edilir. Bu siyahı Maliyyə Monitorinqi Xidmətinin direktorunun 02 mart 2010-cu il tarixli əmri ilə təsdiq edilmiş analoji siyahıya müvafiq dəyişikliklər edilməklə hazırlanıb. Əvvəlki siyahıda əməkdaşlıq etməyən 46 ölkə var idi, yeni siyahıda isə bu ölkələrin sayı 33-ə enib.

Əvvəlki siyahıda göstərilmiş bir sıra ölkələrin FATF və digər beynəlxalq təşkilatlar qarşısında öhdəliklərini yerinə yetirməsi və bu istiqamətdə müvafiq tədbirləri icra etmələri onların "qara siyahı"dan çıxarılmalarını, beləliklə də siyahıya daxil edilmiş ölkələrin sayında azalmanı şərtləndirib.

Mövcud qanunvericiliyə əsasən, monitorinq subyektləri siyahıda müəyyən edilmiş dövlətlərlə açıq-aşkar iqtisadi və ya qanuni məqsədi olmayan pul vəsaitləri və ya digər əmlakla əməliyyatların məqsədini və mahiyyətini aydınlaşdırmalı və həmin ölkələrlə aparılan əməliyyatlar barədə Maliyyə Monitorinqi Xidmətini dərhal məlumatlandırmalıdır. Əməkdaşlıq etməyən ölkələrin Siyahısının yeni variantı monitorinq subyektlərinə və aidiyyəti nəzarət orqanlarına təqdim edilib.

Yeni siyahıda olan 33 ölkəyə Beliz, Boliviya, Ermənistan, Əfqanıstan, Filippin, İran, İraq, Kolumbiya, Konqo, Koreya Xalq Demokratik Respublikası, Kosta-Rika, Kot-d'İvuar, Kuka adaları, Qvatemala, Laos, Liberiya, Marşal adaları, Meksika, Montserrat, Myanma, Nauru, Niue, Pakistan, Panama, Peru, San-Tome və Prinsipi adaları, Somali, Sudan, Syerra-Leone, Tailand, Uruqvay, Vanuatu və Vyetnam aid edilir.

Azərbaycan 2003-cü ilin sonunda Moneyval-ın yeni təlimatlarına əsasən qiymətləndirməni keçmiş ilk ölkə olub. Bu təlimatlar "40 + 8" (çirkli pulların yuyulmasına qarşısının alınması üzrə 40 standart və terrorizmin maliyyələşdirməsinin qarşısının alınması üzrə 8 standart) prinsipi üzrə FATF-ın hər bir standartına uyğunluğun ayrı-ayrı qiymətləndirmələr kompleksidir. Lakin standartlardan hər biri ümumilikdə 180 yarımmaddə təşkil edən bir neçə abzasdan ibarətdir. Bütün bəndlər üzrə vahid qiymətləndirmə verilmir və ölkə hər bənd üzrə ayrıca qiymətləndirmə alır. Azərbaycan nəzərəçarpacaq dərəcədə FATF standartlarına uyğundur və ölkəyə Moneyval tərəfindən verilən qiymətləndirmə idarələrarası ekspert qrupu çərçivəsində göstərilmiş qiymətləndirmədən daha yüksəkdir.

Qiymətləndirmənin birinci raundu 2003-cü ilin mayında keçirilib. Onun əsasında Azərbaycan FATF-ın yeniləşdirilmiş standartlarına uyğun ölkələr kateqoriyasına aid edilib. Bu andan standartlara terrorizmin maliyyələşdirilməsinin qarşısının alınması haqqında yeni standart əlavə edilib. İkinci qiymətləndirmə 2008-ci ildə keçirilərək konstruktiv xarakterizə edilib.

11 dekabr 2009-cu il tarixdə XXXI plenar iclas çərçivəsində Moneyval-ın (Avrop Şurasının "çirkli" pulların yuyulması üzrə ekspert qrupu) Azərbaycana qarşı 2006-cı ildə tətbiq etdiyi xüsusi rejim monitorinqinin aradan qaldırılması və digər ölkələrdə tətbiq edilən adi prosedura keçid barədə qərar qəbul edilib.

Belə qərar Azərbaycanın cinayət yolu ilə əldə edilən pul vəsaitlərinin və mülkiyyətin, terrorizmin maliyyələşməsinin qarşısının alınması sahəsində qanunvericiliyin yaradılmasında və tətbiqində əldə ediyi nailiyyətlərə, eləcə də Mərkəzi Bank yanında Maliyyə Monitorinqi Xidmətinin fəaliyyətə başlaması ilə bağlı qəbul edilib.

Xəbər lenti

Xəbər lenti