Azərbaycan, Bakı, 15 sentyabr /Trend, müxbir İ.Xəlilova/
Azərbaycan Mərkəzi Bankının (AMB) açıqladığı ödəniş balansına əsasən, 2010-cu ilin birinci yarısında ölkənin ödəniş balansının cari əməliyyatlarının say profisiti 7,961 milyard dollar təşkil edib. Bu göstərici ötən ilin analoji dövründə 4,481 milyard dollar olub. Bu barədə çərşənbə günü Mərkəzi Bankdan bildiriblər. Cari əməliyyatların say profisitinin həcmi 1,8 dəfə artıb.
"Ötən il olduğu kimi, 2010-cu ilin birinci yarısında da neft-qaz sektorunun xarici iqtisadi əməliyyatları üzrə müsbət saldo, qeyri-neft sektoru üzrə isə mənfi saldo yaranıb. Neft-qaz sektoru üzrə 10,1 milyard dollar məbləğində cari say profisiti 2,1 milyard dollara çatan qeyri-neft sektoru üzrə cari sayın defisitini tam ödəməyə imkan verib", - Mərkəzi Bankdan deyiblər.
Neft-qaz sektorundan daxilolmalar əsasən neft və təbii qazın ixracı və bu sektora cəlb edilən xarici kapital hesabına formalaşır. Bu sektor üzrə ödənişlər gəlirin və investisiya repatriasiyası, avadanlıq və xidmətlərin idxalı nəticəsində əldə edilir. 2010-cu ilin birinci yarısında neft-qaz sektoru üzrə ümumi müsbət saldo 9,9 milyard dollar təşkil edib.
Hesabat dövründə xarici mal dövriyyəsinin ümumi həcmi 16,1 milyard dollar, xarici ticarət balansının müsbət saldosu isə 10,2 milyard dollar (ötən ilin analoji dövrü ilə müqayisədə 1,73 dəfə artım) təşkil edib. Malların idxalı 2,956 milyard dollar, ixrac əməliyyatları isə 13,192 milyard dollar məbləğində edilib.
Hesabat dövründə ticari münasibətlər 130 ölkə ilə həyata keçirilib. Ticarət dövriyyəsinin 12,3 faizi MDB ölkələri ilə aparılan əməliyyatların, 87,7 faizi isə xarici ölkələrin payına düşür. İntensiv ticari münasibətlər İtaliya, İsrail, ABŞ, Fransa, Rusiya, İndoneziya, Türkiyə, Ukrayna, Böyük Britaniya və Malayziya ilə aparılıb. Azərbaycanın ixrac-idxal əməliyyatlarından onların payına 72 faiz düşür.