Azərbaycan, Bakı, 21 sentyabr /Trend, müxbir N.İsmayılova/
Oktyabrın 18-də Parisdə İqtisadi Əməkdaşlıq və İnkişaf Təşkilatının Maliyyə Tədbirləri üzrə İşçi Qrupunun (FATF) plenar iclasında Azərbaycanın "xüsusi diqqət" tələb edən ölkələr sırasından çıxarılması məsələsinə baxılacağı gözlənilir. Bu barədə Qiymətli Kağızlar üzrə Dövlət Komitəsinin rəhbəri, "çirkli pulların yuyulması" üzrə idarələrarası işçi qrupun başçısı Rüfət Aslanlı bildirib.
"Bu yaxınlarda Bakıya gələn FATF missiyasının yekunları üzrə rəsmi hesabatı hələlik almamışıq, lakin oktyabrın 18-də Parisdə keçiriləcək növbəti plenar iclasın gedişi qrafikinə uyğun olaraq, bu missiyanın nəticələri müzakirə olunacaq", - Aslanlı bildirib.
Onun sözlərinə görə, ilkin hesabat Azərbaycan hökumətinə təqdim olunacaq və onun çərçivəsində məsləhətləşmələr aparılacaq.
"Azərbaycanın FATF-ın "xüsusi diqqət" tələb edən ölkələr siyahısından çıxarılması ilə bağlı gözləntiləri nikbindir", - işçi qrupun rəhbəri deyib.
Missiyanın tərkibinə FATF-ın icraçı-katibi Kevin Vandertqrift, ABŞ Maliyyə Departamenti yanında Maliyyə Cinayətkarlığı və Terrorizmin Maliyyələşdirilməsi Agentliyinin siyasi müşaviri Kristofer Burdik, "Moneyval"ın icraçı-katibi Con Rinqas, Almaniya Maliyyə Nəzarəti Federal Təşkilatının pulların yuyulması ilə mübarizə şöbəsinin rəhbəri Cens Ferhof daxil olub.
İqtisadi Əməkdaşlıq və İnkişaf Təşkilatının Maliyyə Tədbirləri üzrə İşçi Qrup (FATF) - cinayət gəlirlərinin "əldə edilməsi" və terrorizmin maliyyələşməsi ilə mübarizədə kollektiv tədbirlərin hazırlanması və həyata keçirilməsi üçün yaradılan hökumətlərarası təşkilatdır. FATF 1989-cu ildə Parisdə keçirilən "böyük səkkizlik" sammitinin qərarına uyğun yaradılıb. Hazırda FATF-a 34 iştirakçı daxildir. FATF 1990-cı ildə pul vəsaitlərinin yuyulması ilə mübarizə aparmaq üçün 40 tövsiyə hazırlayıb. 1996 və 2003-cü illərdə pulların silinməsi texnologiyasının inkişaf etməsi ilə əlaqədar onlara yenidən baxılıb.
Bundan başqa, FATF 2001-ci ildə terrorizmin maliyyələşdirilməsi ilə mübarizədə doqquz xüsusi tövsiyə də hazırlayıb. O, 2004-cü ilin oktyabrında dünyada dəyişmiş siyasi vəziyyətə uyğunlaşdırılıb. Bu sənədlər pulların silinməsi və terrorizmin maliyyələşməsinin qarşısının alınması üzrə beynəlxalq standartlar kimi qəbul edilib.