Azərbaycan, Bakı, 24 sentyabr /Trend, müxbir N.İsmayılova/
Almaniya-Azərbaycan Fondu 2011-ci ilin yayında dərəcələrə bölünmüş banklar statusuna aid olan tərəfdaş bankların siyahısını genişləndirməyi planlaşdırır. Bu barədə cümə günü Almaniya-Azərbaycan Fondunun texniki meneceri Andreas Franke deyib.
Bu status Fond nümayəndələrini Almaniya-Azərbaycan Fondunun vəsaitləri hesabına əməliyyatlar üzrə qərarın qəbul edilməsi zamanı bankın Kredit komitəsində iştirakdan azad edir. Hazırda dərəcələrə bölünmüş banklar statusuna "Bank Respublika", "Bank of Baku" və qismən "Unibank" (kiçik kreditlər üzrə) aiddir.
"Bu proses start götürən kimi, ilk növbədə, "Unibank" olacaq, biz belə statusun "AGbank" və "Parabank"a da verilməsini nəzərdən keçiririk", - Franke qeyd edib.
Hazırda Fondun fəaliyyəti 36 xidmət məntəqəsinin işlədiyi 16 regionu əhatə edir.
Almaniya-Azərbaycan Fondunun tərəfdaşları bunlardır: "Bank of Baku" və "Unibank" (2001-ci ilin martından), 2003-cü ilin yanvarından "Parabank" və "Bank Respublika", 2004-cü ilin sentyabrından "DəmirBank" və "AGBank", 2006-cı ilin dekabrından "Rabitəbank" və "Muğan Bank", 2007-ci ilin fevralından isə "Nikoil Bank".
Fond tərəfindən maliyyələşmə "KfW" bankının kreditləri hesabına 2001-ci ildə başlayıb. Almaniyanın "KfW" bankı Almaniya-Azərbaycan Fonduna iki tranşla 8,7 milyon avro ayırıb. "KfW" və AYİB-in kreditlərindən istifadə artıq başa çatıb, odur ki, hazırda yerli bankların maliyyələşməsi revolver hesabdan həyata keçirilir. "Avrobank" Almaniya-Azərbaycan Fondu vasitəsilə maliyyələşməyə 2006-cı ildə Azərbaycanda mikro və kiçik sahibkarlıq üçün ictimai maliyyələşmə xidmətləri mexanizmi (AMBF-MSE) çərçivəsində qoşulub.
Hazırda hər bir bank üçün Almaniya-Azərbaycan Fondu hesabına eyni vaxtda kreditin alınmasına maksimum limit 2-2,5 milyon avro təşkil edir.
Almaniya-Azərbaycan Fondunun yaradılması haqqında razılaşma 1999-cu ildə imzalanıb. Lakin kreditlərin verilməsinə 2001-ci ilin martından başlanılıb.
Sentyabrın 24-nə olan rəsmi məzənnə 0,8030 AZN/USD təşkil edir.
