Azərbaycan, Bakı, 30 sentyabr /Trend, müxbir N.İsmayılova/
Azərbaycan bankı "Paşa Bank" ilin sonunadək kredit portfelinin həcmini 200 milyon manata çatdırmaq niyyətindədir. Bu barədə cümə axşamı bankın İdarə Heyətinin sədri Fərid Axundov deyib.
"Bank üçün kreditləşmədə prioritet nəqliyyat, telekommunikasiya, ticarət, xidmətlər və aqrar sahələridir. Biz bankın kredit portfelinin həcmi ilə bağlı proqnozlarını ötürük və gözlənildiyi kimi, ilin sonunadək 200 milyon manat göstəricisinə çatacağıq", - Axundov qeyd edib.
2010-cu ilin əvvəlində bankın kredit portfelinin ümumi həcmi 2,6 faiz artaraq 122,08 milyon manata çatıb, halbuki 2008-ci ildə bu rəqəm 46,225 milyon manat olub.
"Paşa Bank" 2007-ci ilin iyununda yaradılıb. Bank 115,41 milyon manat təşkil edən nizamnamə kapitalı ilə Azərbaycanın bank sektorunda ikinci yeri tutur.
"Paşa Bank"ın strateji vəzifəsi korporativ sektorda xidmətlər göstərməkdən ibarətdir. Bankın əsas məqsədi piroritet istiqamətlərdən irəli gələn biznesin keyfiyyətli inkişafı, eləcə də müştəri və əməkdaşlarla uzunmüddətli və etibarlı münasibətlərin qurulmasından ibarətdir.
Sentyabrın 30-na olan rəsmi məzənnə 0,8027 AZN/USD təşkil edir.
