Azərbaycan, Bakı, 15 oktyabr /Trend, müxbir İ.Xəlilova/
2011-ci ildə iqtisadiyyata investisiyaların həcmi 2010-cu illə müqayisədə 17 faiz artaraq 11,4 milyard manat səviyyəsində proqnozlaşdırılır. Bu barədə cümə günü Azərbaycanın iqtisadi inkişaf naziri Şahin Mustafayev deyib. Sonrakı üç ildə Azərbaycan iqtisadiyyatında kapital qoyuluşlarının həcmi 37 milyard manat təşkil edəcək.
"2011-ci ildə xarici investisiyalar 4 milyard manat səviyyəsində gözlənilir, sonrakı üç ildə onların həcmi orta hesabla 10,6 faiz artaraq 16 milyard manata çatacaq", - nazir bildirib.
Mustafayev deyib ki, gələn il dövlət sərmayələri 5,9 milyard manat, qeyri-dövlət sərmayələri isə 5,5 milyard manat həcmində gözlənilir. Neft sektoruna sərmayələr 4 milyard manat, qeyri-neft sektoruna isə 7,4 milyard manat təşkil edəcək.
"Dövlət sərmayələri proqramı çərçivəsində başlanmış layihələrin tamamlanmasına, infrastruktur, irriqasiya, su təchizatı, energetika, ekologiya, kənd təsərrüfatı, eləcə də sosial layihələrə (təhsil, səhiyyə, mədəniyyət və idman sahəsində obyektlərin təmiri və tikintisi, şəhid ailələrinin mənzil şəraitinin, qaçqın və məcburi köçkünlərin sosial yaşayış şəraitinin yaxşılaşdırılmasına) üstünlük veriləcək", - nazir deyib.
2010-cu ilin yanvar-avqust aylarında Azərbaycanda iqtisadi və sosial sahənin inkişafına bütün maliyyə mənbələrindən 5218,1 milyon manat vəsait qoyulub ki, bu da ötən ilin analoji dövr göstəricisindən 11,3 faiz çoxdur.
Xarici investisiyalar ötən ilin hesabat dövrü ilə müqayisədə 31,5 faiz artaraq 1103,1milyon manat təşkil edib, investisiyaların ümumi həcmində onların xüsusi çəkisi 21,1 faiz olub. Kapital qoyuluşlarının ümumi həcminə uyğun olaraq, 4,1 milyard manat təşkil edən daxili sərmayələrin payına 78,9 faiz düşüb. Daxili sərmayələrin böyük hissəsi (71,8 faiz) dövlət müəssisəsi və təşkilatlarının, yalnız 28,2 faizi özəl müəssisələrin payına düşüb.
Əsas kapitala qoyulan əsas vəsaitlərin 69,5 faizi (3626,6 milyon manat) ölkədə qeyri-neft sektorunun inkişafına, 12 faiz (625,5 milyon manat) qeyri-neft sənayesinin, 30,5 faiz isə (1591,5 milyon manat) neft sektorunun payına düşüb.
Oktyabrın 15-nə olan rəsmi məzənnə 0,8015 AZN/USD təşkil edir.
