Azərbaycan, Bakı, 6 noyabr /Trend, müxbir Ə.Yusifzadə/
Sentyabrdan oktyabradək olan dövrdə (İranda il martın 21-dən başlayır) İranda mal və xidmətlərin istehlak qiymətlərinin indeksi 1,8 faiz, ötən ilin analoji dövrü ilə müqayisədə isə 11,9 faiz artıb. Bu barədə İranın Mərkəzi Bankı məlumat verib. 2009-cu ilin oktyabrından 2010-cu ilin oktyabrınadək olan dövrdə inflyasiya 2008-ci ilin oktyabrından 2009-cu ilin oktyabrınadək olan dövrlə müqayisədə 9,2 faiz təşkil edib.
Bir müddət əvvəl İranda bahalaşmasına hökumətin qadağa qoyduğu 22 növdə ilkin tələbat mallarının siyahısı dərc edilib.
İlkin tələbat mallarının siyahısına düyü, bitki yağı, qənd, ət, quş, yumurta, çörək, süd məhsulları (süd, yoğurt, yağ, pendir), makaron məmulatları, paxlalar (mərci, lobya, noxud və s.) və dənli bitkilər (arpa, qarğıdalı), çay, xurma, kartof, soğan, pomidor, tomat pastası, meyvələr (alma, banan) və sitrus meyvələri (mandarin və portağal), yuyucu toz, polad, sement, kağız (qəzetlər, çap məhsulları), avtomobil təkərləri (minik, yük və avtobus) daxil edilib.
İranın Ticarət Nazirliyi qiymətlərin kəskin artımının qarşısını almaqdan ötrü istehsalçılarla saziş imzalayıb və 113 növdə ilkin tələbat mallarının ehtiyatını təmin edib.