Azərbaycan, Bakı, 11 noyabr /Trend, müxbir S.Ağayeva/
Azərbaycan və İordaniya hökumətləri ticari-iqtisadi əməkdaşlığın inkişafı üzrə danışıqlara hazırlaşırlar.
Danışıqlar dekabrın 23-24-də Bakıda iqtisadi əməkdaşlıq üzrə hökumətlərarası komissiyanın ikinci iclası zamanı keçiriləcək. Bu barədə Trend-ə cümə axşamı Əmmandan telefonla Azərbaycanın İordaniyadakı səfiri Elman Araslı deyib.
"Ticari-iqtisadi münasibətlərin inkişafı üçün hər iki tərəf kifayət qədər potensiala malikdir və ən əsası odur ki, perspektivləri komissiyanın iclası zamanı müzakirə ediləcək əməkdaşlığın inkişafına qarşılıqlı maraq var", - səfir bildirib.
"Qısa müddət ərzində Azərbaycan və İordaniya arasında sanballı normativ-hüquqi baza yaradılıb. 2006-cı ildən etibarən müxtəlif sahələrdə qarşılıqlı fəaliyyətin genişssahəli məsələlərini əhatə edən 30-dan çox hökumətlərarası və nazirliklərarası razılaşma imzalanıb", - bundan əvvəl Trend-ə müsahibəsində səfir qeyd edib.
Birgə hökumətlərarası komissiyanın ilk iclası 2009-cu ilin fevralında Əmmanda keçirilib.
Bu gün ərzaq, əczaçılıq və digər sahələri təmsil edən 10-dan çox İordaniya şirkəti öz məhsullarını Azərbaycan bazarında artıq satışa çıxarıb. Bu yaxınlarda Azərbaycan şirkətlərindən biri kənd təsərrüfatı məhsulları sahəsində iordaniyalı tərəfdaşları ilə əməkdaşlıq etməyə başlayıb.
"Ümumilikdə ölkələrimiz arasında mal dövriyyəsinin səviyyəsi hələ ki yüksək deyil, lakin artıq neçə ildir göstəricilərdə sabit artım müşahidə olunur. Belə ki, bizdə olan məlumata görə, təkcə keçən il mal dövriyyəsinin artım göstəricisi ən azı 40 faizə çatıb", - bundan əvvəl səfir Trend-ə bildirmişdi.
Azərbaycan Dövlət Statistika Komitəsinin məlumatına görə, yanvar-avqustda Azərbaycan və İordaniya arasında mal dövriyyəsinin həcmi 1,5 milyon dollar təşkil edib.
