Azərbaycan, Bakı, 12 noyabr /Trend, müxbir İ.Xəlilova/
Azərbaycan Mərkəzi Bankı (AMB) dolların milli valyutaya olan məzənnəsini yenidən möhkəmləndirməyə başlayıb. Keçən cümə günü - noyabrın 5-də Mərkəzi Bank tərəfindən müəyyənləşdirilən dolların manata nisbətən məzənnəsi ucuzlaşaraq tarixi minimuma - 0,7997 AZN/USD-ə çatmışdısa, bu gün dollar 0,05 faiz möhkəmlənib və 0,8001 AZN/USD təşkil edir.
İlin əvvəlinə olan məlumata görə, 2009-cu il noyabrın 12-də dolların manata olan məzənnəsi 0,8029 AZN/USD təşkil edərək cari ilin noyabrın 12-nə olan göstərici ilə müqayisədə 0,35 faiz ucuzlaşıb.
Cümə günü Trend-ə AMB-dən deyilənə görə, dünya valyuta bazarında ABŞ dollarının məzənnəsinin ucuzlaşması ölkə daxilində məzənnənin formalaşdırılması mexanizminə transmissiya effekti göstərir.
"Daxili valyuta bazarında tələb və təklif "manat-dollar" cütlüyünün məzənnəsinin formalaşdırılmasına təsir göstərən əsas faktordur. Bununla yanaşı, AMB 2010-cu ilin qalan dövrü ərzində də milli valyutanın stabil məzənnəsinin saxlanılması siyasətini aparmaq niyyətindədir", - AMB-dən bildiriblər.
2011-ci ildə də AMB-nin məzənnə siyasəti ölkə daxilindəki vəziyyətdən və qlobal maliyyə iqlimindən asılı olaraq həyata keçiriləcək. Məzənnə siyasəti həyata keçirilən zaman əsas diqqət inflyasiya proseslərinə və ölkənin rəqabət qabiliyyətinin qorunmasına yönələcək.
AMB belə məzənnə siyasətini onunla izah edir ki, məzənnənin inflyasiyaya təsirini tədqiq edən zaman nominal effektiv məzənnənin dəyişməsinə, yəni, ikitərəfli məzənnəyə deyil, çoxtərəfli məzənnəyə yönəltmək lazımdır. 2010-cu ilin doqquz ayı ərzində neft sektoru üzrə nominal effektiv məzənnə üç faiz möhkəmlənib.
"Bu, ilk növbədə Azərbaycana inflyasiyanın idxalını məhdudlaşdırdı, o cümlədən tərəfdaş ölkələrdə inflyasiya proseslərinin güclənməsini və taxılın qiymətinin artmasını müəyyən dərəcədə neytrallaşdırmağa imkan verdi", - AMB-dən qeyd ediblər.
Dünyanın əksər ölkələri milli valyutalarının dəyərinin azaldılması yolu ilə ixrac və iqtisadi artımı fəal surətdə stimullaşdırmağa başlayıblar. Lakin AMB-də bu tədbirlərin təminini təkcə məzənnə siyasəti ilə əlaqələndirməyi düzgün hesab etmirlər. Məzənnə siyasəti vasitəsilə bu proseslərə yalnız müəyyən töhfələr vermək mümkündür. AMB-nin ölkə iqtisadiyyatının strukturuna uyğun apardığı məzənnə siyasəti ixracın genişləndirilməsi və iqtisadi artımın tezləşdirilməsi məqsədləri güdür.
"Yəni Mərkəzi Bank öz məzənnə siyasətini həyata keçirən zaman ölkənin rəqabət qabiliyyətinin qorunmasının zəruriliyini nəzərə alır. Belə siyasət nəticəsində əksər hissəsi Türkiyə, Rusiya, Ukrayna, Gürcüstan, İran, Qazaxıstan, Belarusun payına düşən qeyri-neft sektoru üzrə manatın real effektiv məzənnəsi 2010-cu ilin doqquz ayının yekunlarına görə 1,1 faiz ucuzlaşıb.
Gələn il üçün manatın dollara olan məzənnəsi 0,804 AZN/USD səviyyəsində proqnozlaşdırılır.
