Azərbaycan, Bakı, 15 noyabr /Trend/
Yanvar-oktyabr aylarında Azərbaycanın nəqliyyat sektorunda 162,1 milyon ton müxtəlif yüklər daşınıb ki, bu da 2009-cu ilin yanvar-oktyabr aylarında olduğundan 2,7 faiz çoxdur. Bu barədə Azərbaycan Dövlət Statistika Komitəsindən bildirilib.
Yanvar-oktyabr aylarında daşınan yüklərin ümumi həcminin 74 faizi özəl sektorun payına düşür. Bu ilin yanvar- oktyabr aylarında yüklərin ümumi həcminin 50,7 faizi avtomobil nəqliyyatı ilə, 32,2 faizi boru kəmərləri, 11,3 faizi dəmiryol və 5,8 faizi dəniz nəqliyyatı ilə daşınıb.
Yanvar-oktyabr aylarında sərnişin nəqliyyatı ilə 1,1 milyard sərnişin daşınıb ki, bu da ötən ilin analoji dövr göstəricisindən 4 faiz çoxdur. Sərnişinlərin əsas hissəsi (86,5 faiz) avtomobil nəqliyyatı və metro ilə (13,1 faiz) daşınıb.
Dəmiryol nəqliyyatı ilə 18,3 milyon ton müxtəlif yüklər daşınıb ki, bu da 2009-cu ilin yanvar-oktyabrındakı göstəricidən 6,1 faiz çoxdur.
Dəniz nəqliyyatı ilə 9,4 milyon ton müxtəlif yüklər daşınıb. Bu, ötən ilin analoji dövründən 14,7 faiz azdır. Daşınan yüklərin 2/3-si neft və neft məhsullarının, qalan həcm isə quru yüklərin payına düşür. Daşınan yüklərin bütün həcmi beynəlxalq əməliyyatların payına düşür. Azərbaycan limanlarında emal olunmuş yüklərin həcmi yanvar-oktyabrda 8,6 milyon ton təşkil edib ki, bu da ötən ilin analoji dövründəkindən 24,9 faiz çoxdur.
Avtomobil nəqliyyatı ilə 82,2 milyon ton yük daşınıb. Bu, ötən ilin yanvar-oktyabr aylarındakından 6 faiz çoxdur. Sərnişindaşımanın həcmi 981,9 milyon nəfər (artım 7,7 faiz) təşkil edib. Sərnişinin 96,4 faizi avtobuslarla, 3,6 faizi minik avtomobilləri ilə daşınıb.
Metropolitenlə sərnişindaşımanın həcmi 148,2 milyon nəfər təşkil edərək 14,6 faiz azalıb.
Yanvar-oktyabr aylarında hava nəqliyyatı ilə 859 min sərnişin daşınıb. Daşımaların həcminin 22 faizi özəl sektorun payına düşüb.
Bu ilin yanvar-oktyabr aylarında Avrasiya nəqliyyat dəhlizi ilə Azərbaycan ərazisindən 38,1 milyon ton yük daşınıb ki, bu da ötən ilin analoji dövr göstəricisindən 7,7 faiz çoxdur.
