Azərbaycan, Bakı, 6 dekabr /Trend, müxbir Ü.İsmayılova/
Azərbaycanda daşınmaz əmlakın icbari sığortası tətbiq ediləcək. Bu barədə Azərbaycan Maliyyə Nazirliyinin Dövlət Sığorta Nəzarəti Xidmətinin rəhbəri Namiq Xəlilov "Əmlak Bazarı İştirakçıları" İctimai Birliyinin nəşr etdirdiyi jurnala müsahibəsində bildirib.
"Öz daşınmaz əmlakını sığortalamayan şəxs hətta təbii fəlakətin baş verəcəyi halda belə, dövlətdən kompensasiya almayacaq", - Xəlilov deyib.
Onun sözlərinə görə, daşınmaz əmlakın icbari sığortası "İcbari sığorta haqqında" qanun layihəsində nəzərdə tutulub. Həmin sənədə görə, mülkiyyətçilər daşınmaz əmlakın sayından asılı olmayaraq onu icbari qaydada sığortalamalıdırlar.
Xəlilov bildirib ki, daşınmaz əmlakın icbari sığortası dünyanın bir çox ölkələrində tətbiq olunur. Azərbaycandakı sığorta şirkətləri də ölkədə sığorta biznesinin inkişafı, eləcə də təbii fəlakətlər zamanı kompensasiyaların təmin edilməsi məqsədilə daşınmaz əmlakın icbari sığortasının tətbiqini təklif edirlər.
"Daşınmaz əmlakın sığortası sığortanın ən ucuz növlərindən biridir. Çünki yerli mütəxəssislərin hesablamalarına görə, bütün risklərdən sığortalanmaq üçün əmlakın dəyərinin cəmi 0,1 faizinin ödənilməsi kifayətdir", - Xəlilov bildirib.
Bu sahədə nəzarət məsələsinə gəldikdə, Xəlilov deyib ki, nəzarətin növlərindən biri əmlakın alqı-satqısı zamanı sığortanın tələb edilməsidir. Lakin bu metod heç də həmişə özünü doğrultmur, çünki bəzən adamlar bütün ömürləri boyu bir mənzildə yaşayırlar və onun alqı-satqısını həyata keçirmirlər. Nəzarətin bu növünün səmərəsizliyi üzündən başqa bir üsul tətbiq etmək mümkündür. Bu da əmlakını sığortalamayan mülkiyyətçilərə təbii fəlakətlər zamanı dövlət tərəfindən kompensasiyanın verilməməsidir.
"Bu nəzarət üsulunun üstünlüklərindən biri ondan ibarətdir ki, əgər vətəndaş öz əmlakından ötrü narahat olmursa, o zaman dövlət də ona kömək etməyəcək", - Xəlilov deyib.
Azərbaycanda fəaliyyət göstərən 27 sığorta şirkətinin yanvar-oktyabr aylarında sığorta haqılarının həcmi 130,30 milyon manat, ödənişləri isə 41,27 milyon manat təşkil edib.
Əmlakın sığortalanması Non-life sığortası arasında ən populyar sığortadır. Yanvar-oktyabr aylarında əmlak sığortası üzrə ölkənin bütün sığorta şirkətlərinin haqları 75,92 milyon manat, ödənişləri isə 18,79 milyon manat təşkil edib.
Dekabrın 6-na olan rəsmi məzənnə 0,7995 AZN/USD təşkil edir.