Azərbaycan, Bakı, 7 dekabr /Trend, müxbir N.İsmayılova/
Dünya Bankının (DB) səhiyyə üzrə baş mütəxəssisi Patrisio Markezin başçılıq etdiyi missiya Azərbaycanda səhiyyə sisteminin yenidən qurulması üzrə layihənin icmalı məqsədilə çərşənbə günü Bakıya gələcək. Bu barədə çərşənbə axşamı bankın Bakıdakı nümayəndəliyindən bildiriblər.
Missiya ölkədə dekabrın 8-dən 16-dək olacaq.
Azərbaycanda səhiyyə sisteminin yenidən qurulması üzrə layihənin dörd əsas komponenti var: Səhiyyə Nazirliyinin idarəetmə potensialının, sektoral siyasətinin, planlaşdırma və nizamlanmasının gücləndirilməsi; 5 pilot rayonda tibbi keyfiyyətin və səmərəliliyin yaxşılaşdırılması, rayon səviyyəsində xidmətlərin ilkin səviyyəsinin modifikasiyası və 3 rayon xəstəxanasının tikintisi, bu rayonlarda təqdim olunmuş səhiyyənin ilkin və ikinci səviyyəsi arasında əlaqənin möhkəmləndirilməsi; Azərbaycan səhiyyəsinin islahatları, icbari sığorta prinsiplərinə tədricən keçid; tibbi personal üçün proqramların sertifikatlaşdırılması və kadr potensialının yüksəldilməsi.
Layihə 26 iyun 2006-cı ildə DB-nin Direktorlar Şurasında təsdiq olunub, onun həyata keçirilməsinə isə həmin ilin dekabrından başlanılıb. Layihənin ümumi dəyəri 86,75 milyon dollar təşkil edir, bunun 50 milyonu dolları bank tərəfindən ayrılıb, Azərbaycan hökumətinin layihədə iştirak payı isə 28,25 milyon dollar təşkil edir. Qalan vəsaitlər isə Ümumdünya Səhiyyə Təşkilatı, YUNİSEF və USAID tərəfindən ayrılıb. Cari ilin avqustuna DB-nin ayırdığı vəsaitlərin ümumi həcmindən 11,8 milyon dollar istifadə edilib.
Bu, Dünya Bankının Azərbaycanda səhiyyə sisteminin yenidən qurulması sahəsində ikinci layihəsidir. Bankın birinci krediti 5 milyon dollar olub. Onun həyata keçirilməsi 2006-cı ilin sentyabrında başa çatıb.
