Azərbaycan, Bakı, 10 dekabr /Trend, müxbir Ü.İsmayılova/
Azərbaycanda aktuarların fəaliyyəti lisenziyalaşdırılacaq. Bu barədə cümə günü Azərbaycan Maliyyə Nazirliyi nəzdində Dövlət Sığorta Nəzarəti Xidmətinin aparıcı müşaviri Turan Məmmədov deyib.
"Hazırda bu məsələyə dövlət xidmətində baxılır", - Məmmədov bildirib.
Onun sözlərinə görə, Azərbaycanda aktuarlıq fəaliyyətinin lisenziyalaşdırılması ciddi aktuar hesabatlarını tələb edən istehsalatda bədbəxt hadisələrdən icbari sığorta çərçivəsində tətbiq ediləcək.
Bundan əvvəl Dövlət Sığorta Nəzarəti Xidmətinin rəhbəri Namiq Xəlilovun dediyi kimi, hazırda sığorta aktuarların fəaliyyətinin lisenziyalaşdırılmasını nəzərdə tutan "Sığorta fəaliyyəti haqqında" qanuna dəyişikliklər və əlavələr hazırlanır.
Onun sözlərinə görə, aktuarlar tariflərin müəyyənləşdirilməsi məqsədilə məcmu kapitalın və sığorta ehtiyatlarının dəqiq hesablanması üçün mühüm əhəmiyyət kəsb edir.
Xəlilovun sözlərinə görə, aktuarların fəaliyyəti daima yoxlamalar apara bilməyən sığorta nəzarəti orqanı üçün də faydalı olacaq, aktuarlar isə şirkətin maliyyə vəziyyəti haqqında hesabatları mütəmadi olaraq özləri göndərəcəklər.
Qanuna dəyişikliklər qəbul edildikdən sonra şirkətlərin maliyyə hesabatları aktuarların imzaları ilə təsdiqlənir. İndi hesabatlar şirkətlərin rəhbərləri tərəfindən təsdiqlənir.
Aktuar - aktuar hesablamaların nəzəriyyəsinə malik sığorta riyaziyyatı üzrə mütəxəssisdir. Aktuar sığorta növləri üzrə sığorta tariflərinin, sığorta ehtiyatlarının yaradılması üsullarının riyazi və statistik tədqiqatı, böyük rəqəmlər nəzəriyyəsi, həyat sığortası və təqaüdlərin sığortası üzrə məbləğlərin müəyyənləşdirilməsi ilə məşğul olur.
Azərbaycanda 27 sığorta şirkəti və bir təkrar sığorta şirkəti fəaliyyət göstərir.
