Azərbaycan, Bakı, 11 dekabr /Trend, müxbir E.İsmayılov/
Azərbaycanın bütün yolları 15 il ərzində keyfiyyətcə Avropa İttifaqı standartları səviyyəsinə çatdırılacaq. Bu barədə Nəqliyyat Nazirliyinin "Azəryolservis" SC-nin rəhbəri Cavid Qurbanov deyib.
Hazırda Azərbaycanda bütün avtomobil yollarının yenidən qurulması üzrə işlər aparılır.
Qurbanovun sözlərinə görə, Bakı-Rusiya sərhədi magistral yolunun qalan sahəsinin inşası çərçivəsində intensiv işlər aparılır. Artıq 132 kilometrlik birinci növ beton yol sahəsinin inşası üzrə işlər aparılıb. Rusiya ilə sərhədə qədər avtomagistralın ümumi uzunluğu 195 kilometrə yaxın təşkil edir. Hazırda 60 kilometr uzunluğunda qalan sahənin tikintisi çərçivəsində işlər gedir. Bu sahənin tikintisinə təxminən 400 milyon manat məbləğ lazımdır.
Bakı-Rusiya sərhədi yolunun yenidən qurulması layihəsinin ümumi dəyəri təxminən bir milyard manat təşkil edir. "Bu layihə çərçivəsində işlər yalnız ölkənin dövlət büdcəsindən ayrılan vəsait hesabına həyata keçirilir", - Qurbanov deyib.
Həmçinin, Qurbanovun sözlərinə görə, İran istiqamətində avtomobil magistralının yenidən qurulması çərçivəsində işlər davam etdirilir. Yolun uzunluğu 243 kilometr təşkil edir. Bu layihə bütünlüklə Azərbaycanın iştirak payının olduğu beynəlxalq kreditlər hesabına həyata keçirilir. Layihənin dəyəri təxminən bir milyard manat təşkil edir ki, onun da 500 milyonu artıq alınıb. Qurbanovun sözlərinə görə, alınmış vəsaitdən artıq 100 milyon dollar xərclənib.
SC rəhbəri bildirib ki, Gürcüstan ilə sərhəd istiqamətində avtomagistralın yenidən qurulması çərçivəsində işlər demək olar ki, başa çatıb. Xüsusilə də bu istiqamətdə 130 kilometri birinci növ yol, qalan hissəni isə ikinci növ asfalt-beton yolu təşkil edir.
"Bu layihənin maliyyələşdirilməsinin həcmi 500 milyon dollar təşkil edir. Layihə çərçivəsində işlər Azərbaycanın iştirak payı ilə beynəlxalq maliyyələşdirmə hesabına həyata keçirilir", - Qurbanov deyib.
