Azərbaycan, Bakı, 6 yanvar /Trend, müxbir N.İsmayılova/
Azərbaycan bankı "Amrahbank" 2011-ci ildə depozitlər və kreditlər üzrə cari faiz dərəcələrini dəyişməz saxlamaq fikrindədir. Bu barədə cümə axşamı bankın idarə heyətinin üzvü, maliyyə menecmenti departamentinin direktoru Fazil Hüseynov bildirib.
"Bankın depozitlər və kreditlər üzrə faiz dərəcələrinin dəyişdirilməsi hələlik planlaşdırılmır, çünki onlar bu gün bank üçün nisbətən daha əlverişlidir. Bank faiz dərəcələrinə yalnız bazardakı vəziyyətin bunu tələb etdiyi halda yenidən baxmaq fikrindədir", - Hüseynov bildirib.
Onun sözlərinə görə, bu gün kreditlər üzrə bankın orta faiz dərəcələri 24-26 faiz, depozitlər üzrə isə 12-13 faiz təşkil edir.
Bu gün bank tərəfindən istehlak kreditləri 30-dan 36-dək faiz dərəcəsi üzrə iki ilədək müddətə verilir. Kreditin maksimum məbləği iki min manat təşkil edir. Bank tərəfindən mikrokreditlər beş min manatadək 18 ay müddətinə illik 30 faizlə verilir. Avtokreditlər üç ilədək müddətə illik 18 faizlə verilir, maksimum məbləğ 50 min manatdır.
Bu gün "Amrahbank" (1993-cü ildə yaradılıb) Azərbaycanın ilk və aparıcı banklarından biridir. Bank ölkədəki banklar arasında filiallarının sayına görə (23 filial) liderdir. Bankın nizamnamə kapitalı 14 milyon manatı ötür. Səhmlərin 49 faizi Bəhreyndə yerləşən Beynəlxalq İnvestisiya Bankına məxsusdur.
Yanvarın 6-na rəsmi məzənnə 0,7977 AZN/USD təşkil edir.
