Azərbaycan, Bakı, 8 yanvar /Trend, müxbir N.İsmayılova/
Bu günlərdə Bakı Banklararası Valyuta Birjasının (BBVB) iştirakı ilə Mütəşəkkil Banklarası Kredit Bazarının (MBKB) təminatlı pul bazarında (TPB) tədavüldə olan banklararası kreditlər üzrə yeni şərtlərin təsdiqlənəcəyi gözlənilir. Bu barədə Trendə birjanın rəhbəri Fərhad Əmirbəyov məlumat verib.
Valyuta birjası təklifləri razılaşdırılmaq üçün Azərbaycan Mərkəzi Bankına (AMB) təqdim edib. Bu təkliflərdə TPB-də banklararası kreditlərin verilmə müddətinin 30 gündən üç ayadək artırılması göstərilir. Bu gün cəlbetmənin maksimum məbləği bir milyon manatdır və onun iki milyon manatadək artırılması təklif olunur.
2009-cu il oktyabrın 21-də AMB, BBVB və bəzi bankların pul bazarının market-meykerləri (DəmirBank, АGBank, "Nikoil" SKB, Bank Standard, PasaBank, Unibank və Bank of Baku) arasında pul bazarının yeni seqmenti üçün hüquqi əsas olan kollektiv saziş imzalanıb. Daha sonra layihəyə TuranBank və AFB Bank da qoşulub. Bu gün TPB iştirakçılarının sayı doqquz bank təşkil edir.
Təminatlı Pul Bazarı Mərkəzi Bank tərəfindən zəmanət verilən kredit əməliyyatları üzrə öhdəliklərin yerinə yetirildiyi banklararası kredit bazarının seqmentidir. Banklara ticarət limiti AMB tərəfindən təyin olunur və bütün iştirakçılar arasında razılaşdırılır. Ticarət limitlərinin dəyişməsi haqqında qərara da AMB tərəfindən baxılır və qəbul edilir. Sazişin iştirakçısı olan banklardan hər biri ayda bir milyon manatdan çox olmayan kredit vəsaiti cəlb edə bilərlər. Kreditin verilməsinin maksimum müddəti 30 gündən çox deyil. Faiz dərəcələrinin məbləği banklar tərəfindən müstəqil şəkildə təyin edilir.
Yanvarın 8-nə olan rəsmi məzənnə 0,7977 AZN/USD təşkil edir.
