Azərbaycan, Bakı, 19 yanvar /Trend, müxbir N.İsmayılova/
BMT-nin proqnozlarına görə, 2011-ci ildə Azərbaycanda real ÜDM-in artımı 3 faiz, 2012-ci ildə isə 6,5 faiz təşkil edəcək. Bu barədə çərşənbə günü BMT-nin rəsmi saytında dərc olunmuş "Dünyadakı iqtisadi vəziyyət və 2011-ci ildə perspektivlər" adlı məruzədə bildirilir. Ümumilikdə MDB regionu üçün BMT-nin proqnozları 4,1 faiz təşkil edir.
Proqnozlara görə, Azərbaycanda inflyasiya 2011-ci ildə 4,6 faiz, 2012-ci ildə isə 4,8 faiz səviyyəsinədək azalacaq. MDB regionu üçün BMT-nin proqnozları 8,3 faiz təşkil edir.
"Qeyri-bərabər bərpasından bir il keçdikdən sonra bir çox ölkələrdə qlobal iqtisadi artım 2010-cu ilin ortalarında zəifləməyə başlayıb. Gözlənildiyinə görə, artımın ləngiməsi 2011-ci və 2012-ci illərdə davam edəcək, çünki inkişaf etmiş əsas ölkələrin iqtisadiyyatının zəif yeri qlobal bərpanı əngəlləməkdə davam edir və yaxın illərdə dünyada iqtisadi sabitlik üçün risklər yaradır", - məruzədə deyilir.
BMT-nin məruzəsində deyildiyi kimi, böhranın ilkin mərhələlərində hökumətlərin qəbul etdikləri miqyasına görə misilsiz iqtisadi siyasət şübhəsiz ki, maliyyə bazarlarının sabitləşməsinə kömək edib və bərpaya təkan verib. 2010-cu il ərzində bu tədbirlər sıfıra endirilib və çox güman ki, yaxın gələcəkdə daha azmiqyaslı olacaq. Xüsusilə, inkişaf etmiş ölkələrdəki bir çox hökumətlər artıq büdcə vəsaitlərinin sərt qənaəti istiqamətində yerlərini dəyişirlər. Bu, 2011-ci və 2012-ci illərdə dünya iqtisadiyyatının artımına mənfi təsir göstərəcək.
"Xam məhsulların əksəriyyətinin qiymətləri bərpa olunub. Xam neftin dünya qiymətləri 2010-cu ildə 2009-cu ildəki orta hesabla 68 dollar səviyyəsi ilə müqayisədə bir barel üçün təxminən 78 dollar səviyyəsində tərəddüd edib. Buna baxmayaraq, neftin qiymətlərində 2011-ci ildə bir qədər azalma olacağı gözlənilir. Metalların dünya qiymətləri 2010-ci ildəki tendensiya ilə davam edəcək, onların 2011 və 2012-ci illərdə yalnız cüzi artacağı gözlənilir", - hesabatda qeyd olunur.
OPEK-ə daxil olmayan ölkələr tərəfindən 2011-ci ildə neft istehsalının 0,6 faiz artaraq sutkada 52,9 milyon barelə çatacağı gözlənilir. BMT-nin ehtimallarına görə, 2011-ci ildə neftin bir barelinin qiyməti 75 dollar olacaq, 2012-ci ildə isə 80 dollara çatacaq.
Azərbaycan Dövlət Statistika Komitəsinin məlumatına görə, 2010-cu ilin yekunları üzrə ölkədə inflyasiya 5,7 faiz, ÜDM-də artım isə 5 faiz təşkil edib.