Azərbaycan, Bakı, 20 yanvar /Trend, müxbir N.İsmayılova/
Azərbaycan Mərkəzi Bankı (AMB) "AZAL" QSC-yə ("Azərbaycan Hava Yolları") dövlət zəmanəti ilə 300 milyon manatdan çox məbləğdə uzunmüddətli kredit ayırıb. Bu barədə cümə axşamı jurnalistlərə AMB-nin idarə heyətinin sədri Elman Rüstəmov deyib.
"Kredit QSC-nin aviasiya parkının yenilənməsinə, xüsusilə də Naxçıvan istiqamətində reyslərin yerinə yetirilməsinə yönəlib. Çünki hazırda bu park köhnəlib və onun təkmilləşdirilməsi tələb olunur", - Rüstəmov bildirib.
Onun sözlərinə görə, kredit "AZAL"a praktiki olaraq tam ayrılıb, yalnız son tranş qalıb.
"Kredit güzəştli şərtlərlə illik 4 faizlə 12 il müddətinə verilib", - AMB rəhbəri qeyd edib.
Bu, Mərkəzi Bankın tarixində dövlət zəmanəti ilə ölkənin strateji müəssisələrinin maliyyələşdirilməsinə ayrılan dördüncü birbaşa kredit olub.
750 milyon manat məbləğində birinci kredit ARDNŞ-yə yeddi il müddətinə illik iki faizlə, ikincisi isə (202 milyon manat) "Azəralüminium" ASC-yə 10 il müddətinə illik üç faizlə ayrılıb. 300 milyon manat məbləğində üçüncü kredit isə "Azərenerji" ASC-yə ayrılıb.