Azərbaycan, Bakı, 4 fevral /Trend, müxbir N.İsmayılova/
Azərbaycan Sahibkarlar Təşkilatları Milli Konfederasiyası (ASTMK) sahibkarların fəaliyyətinin yoxlanmasının sayının azaldılması məqsədilə ictimai nəzarəti gücləndirmək fikrindədir. Konfederasiyanın sədri Məmməd Musayev cümə günü Yeni Azərbaycan Partiyasının mənzil-qərargahında qurumun 2010-cu ildəki fəaliyyətinin yekunlarına və cari ilin planlarına həsr olunmuş mətbuat konfransında bildirib.
"Biz istəyirik ki, sahibkarların fəaliyyətinin yoxlanmasında konfederasiyanın nümayəndələri də iştirak etsinlər ki, bu da bizə sahibkarların hüquqlarının vaxtında qorunmasına və ədalətsizliyin aradan qaldırılmasına imkan verəcək", - Musayev bildirib.
Bununla yanaşı, ASTMK Beynəlxalq Maliyyə Korporasiyası və Dünya Bankı ilə lisenziyalaşdırma sisteminin qiymətləndirilməsinin aparılması üzrə danışıqlar aparır. Bu gün Azərbaycanda 58 növ lisenziya fəaliyyətdədir.
"Biz Almaniyanın timsalında bu sahədə beynəlxalq təcrübəni də öyrənmişik. Orada lisenziyalaşdırma ilə bilavasitə federal strukturlar deyil, ictimai təşkilatlar məşğul olur və bu cür təcrübənin Azərbaycanda da tətbiq olunmasını təklif etmək istəyirik", - o, deyib.
