Yanvarda Azərbaycanın nəqliyyat sektorunda yükdaşımaların həcmi artıb
Azərbaycan, Bakı, 15 fevral /Trend/
Azərbaycan Dövlət Statistika Komitəsinin məlumatına görə, yanvarda Azərbaycanın nəqliyyat sektorunda 15,4 milyon ton müxtəlif yüklər daşınıb ki, bu da ötən ilin həmin dövründə olduğundan 4 faiz çoxdur.
Yanvarda daşınan yüklərin ümumi həcminin 70,6 faizi özəl sektorun payına düşür. Ötən il daşınan yüklərin ümumi həcminin 46,9 faizi avtomobil nəqliyyatı, 34,9 faizi boru kəmərləri, 11,2 faizi dəmiryol, 7 faizi isə dəniz nəqliyyatı ilə daşınıb.
Yanvarda 105,9 milyon sərnişin daşınıb ki, bu da ötən ilin analoji dövr göstəricisindən 6,1 faiz çoxdur. Sərnişinlərin əsas hissəsi (85,7 faiz) avtomobil nəqliyyatı və metro ilə (13,8 faiz) daşınıb.
Dəmiryol nəqliyyatı ilə 1,7 milyon ton müxtəlif yüklər daşınıb ki, bu da 2010-cu ilin yanvarında qeydə alınan göstəricidən 3 faiz çoxdur.
Dəniz nəqliyyatı ilə 1,1 milyon ton müxtəlif yüklər daşınıb. Bu, ötən ilin yanvar ayında olduğundan 3,3 faiz azdır. Daşınan yüklərin bütün həcmi beynəlxalq əməliyyatların payına düşür. Azərbaycan limanlarında emal olunmuş yüklərin həcmi yanvarda 1,1 milyon ton təşkil edib ki, bu da ötən ilin analoji dövründəkindən 44 faiz çoxdur.
Avtomobil nəqliyyatı ilə 7,2 milyon ton yük daşınıb. Bu, ötən ilin yanvar ayındakından 5,9 faiz çoxdur. Sərnişindaşımanın həcmi 90,8 milyon nəfər (artım 7,6 faiz) təşkil edib. Sərnişinlərin 96,8 faizi avtobuslarla, 3,2 faizi isə minik avtomobilləri ilə daşınıb.
Metropolitenlə sərnişindaşımanın həcmi 14,6 milyon nəfər təşkil edərək 1,9 faiz azalıb.
Yanvarda hava nəqliyyatı ilə 86 min sərnişin daşınıb. Daşımaların həcminin 2,1 faizi özəl sektorun payına düşüb.
2010-cu ildə Avrasiya nəqliyyat dəhlizi ilə Azərbaycan ərazisindən 51,7 milyon ton yük daşınıb ki, bu da 2009-cu ilin göstəricisindən 8,9 faiz çoxdur. 2010-cu ildə dəhliz çərçivəsində 166,5 milyon nəfər daşınıb. Bu, 2009-cu ildə olduğundan 7,9 faiz çoxdur.
