Azərbaycan, Bakı, 17 fevral /Trend, müxbir Ü.İsmayılova/
Azərbaycan İqtisadi İnkişaf Nazirliyi yanında Sahibkarlığa Kömək Milli Fondunun (SKMF) 2011-ci ildə fəaliyyətinin prioritet istiqamətləri quşçuluq sahəsindəki layihələrin maliyyələşdirilməsi olacaq. Bu barədə cümə axşamı SKMF-nin icraçı direktoru Şirzad Abdullayev bildirib.
"Fond tərəfindən 2011-ci il üçün belə prioritet istiqamət yaxın bir neçə il ərzində ölkə əhalisinin daxili istehsal hesabına quş əti ilə 100 faiz təmin olunması barədə dövlət başçısının tapşırığının həyata keçirilməsi məqsədilə seçilib", - Abdullayev deyib.
Onun sözlərinə görə, bununla əlaqədar il ərzində fondun başlıca prioriteti aqrar sektorun intensiv inkişafını təmin edən layihələrin maliyyələşdirilməsi olacaq. Bu məqsədlə fond belə layihələrin maliyyələşdirilməsində öz fəaliyyətini aktivləşdirmək fikrindədir.
Abdullayev qeyd edib ki, fond quşçuluq sahəsinin maliyyələşdirilməsilə yanaşı süd istehsalı müəssisələrinin, heyvandarlıq və anbar komplekslərinin tikintisi kimi sahələrin və yüksək texnologiyaların istifadə edildiyi digər sahələrin maliyyələşdirilməsi üçün vəsait ayıracaq.