Azərbaycan, Bakı, 18 fevral /Trend, müxbir N.İsmayılova/
Dünya Bankı (DB) 2011-ci ildə Azərbaycanda məhkəmə-hüquq sisteminin modernləşdirilməsi üzrə ikinci layihənin həyata keçirilməsinə başlamağı planlaşdırır. Trend-in məlumatına görə, bu barədə cümə günü bankın Azərbaycandakı nümayəndəsi Cozef Ouen CEIBC tərəfindən keçirilən Azərbaycandakı beynəlxalq investisiya layihələrinin reallaşdırılması imkanları haqqında biznes forumunda bildirib.
"Bu layihə mövcud layihənin davamı olacaq. Bank həmçinin ölkənin məhkəmə-hüquq sisteminin modernləşdirilməsinə, məhkəmə fəaliyyətinin idarə olunmasında istifadə olunan metodologiyanın təkmilləşdirilməsinə yönəldilmiş əlavə vəsait təqdim edəcək", - Ouen deyib.
Onun sözlərinə görə, layihənin dəyəri hələ dəqiqləşdirilməyib, lakin DB-nin proqnozlarına görə, 30-32 milyon dollara yaxın təşkil edəcək.
Layihənin ümumi dəyəri 35,6 milyon dollar təşkil edir. Bankın kredit payı 21,6 milyon dollardır. Yaponiyanın xüsusi fond hesabından 3 milyon dollar qrant ayrılıb, Azərbaycan hökumətinin iştirak payı 11 milyon dollardır. Layihə beş ilə hesablanıb.
DB-nin krediti Beynəlxalq İnkişaf Assosiasiyası xətti ilə standart şərtlərlə 35 il müddətinə 10 illik güzəştli dövr olmaqla və illik 0,75 faizlə verilib. 10 illik güzəştli müddət bitdikdə, kreditin 1,25 faizlə ödənilməsinə başlanılacaq. 2026-cı ildən 2041-ci ilədək 2,5 faizlə ödəniləcək.
Bu gün layihə üzrə Ali Məhkəmənin, Konstitusiya Məhkəməsinin, Ədliyyə Nazirliyinin qeydiyyat orqanlarının, eləcə də Məhkəmə-Hüquq Şursının binalarının kompüterləşdirilməsi və texniki təchizatı üzrə işlər aparılır.
DB-nin Direktorlar Şurası 2006-cı il iyunun 29-da Azərbaycanın məhkəmə-ədliyyə sistemi üçün krediti təsdiq edib.
