Azərbaycan, Bakı, 24 fevral /Trend, müxbir Ü.İsmayılova/
Yanvar ayında Azərbaycanın sığorta şirkətlərinin istehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta üzrə mükafatları 278 930,56 manat təşkil edib. Trend-in məlumatına görə, bu barədə Azərbaycan Maliyyə Nazirliyinin sığortaçıların ötən ay üzrə fəaliyyətinin yekunlarına dair hesabatında bildirilir.
Sığorta mükafatlarının ümumi həcmində bu yığımların xüsusi çəkisi 1,55 faiz təşkil edir.
Bu dövr ərzində sığortanın bu növü üzrə ödənişlər hələ həyata keçirilməyib.
Bu gün Azərbaycanda istehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta üzrə xidmətlər göstərmək üçün lisenziyaya malik olan cəmi üç həyat sığortası şirkəti fəaliyyət göstərir. Bunlar "Atəşgah Həyat", "Qala Həyat" və "PAŞA Həyat" şirkətləridir.
Yanvarda toplanan mükafatlar "Atəşgah Həyat" və "Qala Həyat" şirkətlərinin payına düşür, çünki "PAŞA Həyat" şirkəti fevralın 14-də fəaliyyətə başlayıb.
Hazırda Azərbaycanda 28 sığorta şirkəti və bir təkrar sığorta şirkəti fəaliyyət göstərir.
Fevralın 24-nə olan rəsmi məzənnə 0,7943 AZN/USD təşkil edir.