Azərbaycan, Bakı, 25 fevral /Trend, müxbir N.İsmayılova/
Bu gün Azərbaycanın xarici dövlət borcları səkkiz milyard dollara yaxındır. Bu barədə cümə günü Azərbaycanın maliyyə naziri Samir Şərifov məlumat verib.
"Bu gün ölkənin dövlət borcları səkkiz milyard dollara yaxındır, lakin dövlət zəmanəti altında cəlb edilən kreditləri çıxarsaq, o, üç milyard dollardan çox deyil", - Şərifov bildirib.
Onun sözlərinə görə, bu borcların ödənilməsi ilə bağlı hökumətin heç bir problemi olmayacaq, çünki bu, cüzi həcmdir. Cəlb olunan vəsaitlər əsasən uzunmüddətli dövr üçün nəzərdə tutulub və onların faiz dərəcələri yüksək deyil.
Ölkənin dövlət borcu dövlət əhəmiyyətli müəssisələr üçün zamin kimi çıxış edən dövlət tərəfindən cəlb olunmuş və təmin edilmiş birbaşa borclardan ibarətdir. "Azərenerji, AZAL cəlb edilmiş kreditləri öz şəxsi gəlirləri hesabına ödəsələr də, dövlət vəsaitlərin daha aşağı faizlərlə cəlb olunması üçün zamin kimi çıxış edir", - nazir deyib.
2010-cu il oktyabrın 1-nə olan vəziyyətə görə, Azərbaycanın cari dövlət borcları 3736,8 milyon dollara çatıb ki, bu da ÜDM-in 7,9 faizini təşkil edir. Adambaşına 415,32 dollar düşür.
Dövlətin zaminliyi altında imzalanmış sazişlər üzrə ölkənin xarici borcları 8751,1 milyon dollar təşkil edir ki, bu da ÜDM-in 18,6 faizi qədərdir. Adambaşına 972,63 dollar vəsait düşür.
