İranın xarici valyuta ehtiyatları 2010-cu ildə 89 milyard dollar təşkil edib. Bu rəqəm 2011-ci ildə 100 milyard dollara çatdırılacaq. Bunu İranın iqtisadiyyat və maliyyə naziri Seyyid Şəmsəddin Hüseyni deyib.
Trend-in İranın econews.ir saytına istinadən verdiyi məlumata görə, Hüseyni əlavə edib ki, 2007-2008-ci ildə Qərb İran banklarının iflasa uğradığını iddia edirdi, lakin bir müddət sonra öz bankları iflas etdi.
"İranın indiyə kimi heç bir ölkəyə gecikmiş borcu olmayıb, lakin Qərb ölkələri İrana sərmayə yatırmağın riskli olduğunu təbliğ etmək istəyirlər", - Hüseyni deyib.
O, əlavə edib ki, ölkənin beşillik inkişaf proqramına əsasən, xarici sərmayəçilərin ölkəyə investisiya yatırması üçün şərtlərin sədələşdirilməsi nəzərdə tutulub.
"Xarici bankların yerli banklarla əməkdaşlıq etməsi üçün lazımi şərtlərin hazırlanması Mərkəzi Banka tapşırılıb", - Hüseyni deyib.
ABŞ və digər Qərb ölkələri İranı dinc nüvə proqramı adı altında hərbi məqsədlərlə nüvə silahının hazırlanmasında ittiham edirlər. Tehran nüvə proqramının yalnız dinc xarakter daşıdığını bəyan edərək bütün ittihamları rədd edir. Bu günə qədər BMT-nin Təhlükəsizlik Şurası tərəfindən İranın nüvə proqramını dayandırmaq üçün altı qətmanə qəbul olunub, onlardan dördü İrana qarşı iqtisadi və siyasi sanksiyanı nəzərdə tutur, iki qətnamə isə xəbərdarlıq xarakteri daşıyır.