Azərbaycan, Bakı, 28 mart /Trend, müxbir N.İsmayılova/
Azərbaycan Beynəlxalq Bankı (ABB) bu günədək polis postlarında və patrul avtomobillərində 70 POS-terminal quraşdırıb. Bu barədə bazar ertəsi Trend-ə bankın 100 faizlik mülkiyyəti olan "AzeriCard" prosessinq mərkəzinin biznesin inkişafı üzrə rəhbəri Cahangir Məmmədov bildirib.
Martın əvvəlində ABB və Daxili İşlər Nazirliyinin Baş Dövlət Yol Polisi İdarəsində postlarda və patrul avtomobillərində simsiz POS-terminalların quraşdırılması işlərinə başlamaq haqqında qərar qəbul edilib. Bu müddət ərzində POS-terminalların sayı 50 ədəd artıb.
"Bu günədək 70 terminal quraşdırılıb, qaydaları pozan sürücülər bu POS-terminallar vasitəsilə cərimələri yerində ödəyə biləcəklər. Prosessinq mərkəzinin qarşısında qoyulan əsas vəzifə bütün patrul maşınlarının belə terminallarla təchiz olunmasıdır", - o deyib.
Hələlik yalnız bir maddə üzrə, daha doğrusu, 20 manatadək olan cərimələr tətbiq edilir. Məmmədovun sözlərinə görə, cərimələrin yerində ödənilməsi prosesi əhəmiyyətli dərəcədə sadələşdirəcək və sürücülərin vaxtına qənaət edəcək.
Bundan sonra sürücülər yerində, bilavasitə DYP-nin xidməti avtomobillərində cəriməni ödəyəcək və əvəzində qəbz alacaqlar. POS-terminal cərimə qəbzinin iki nüxsəsini verir ki, onlardan biri qaydanı pozan şəxsə təqdim edilir, digər orijinal çek isə tərtib olunmuş inzibati protokola bərkidilir.
Martın 28-nə olan rəsmi məzənnə 0,7932 AZN/USD təşkil edir.
