Bakı. Trend:
Azərbaycanın 2030-cu ilədək Milli İnkişaf Strategiyası özəl sektora əsaslanaraq iqtisadiyyatın daha da diversifikasiyasını nəzərdə tutur.
Bu barədə cümə günü Bakıda keçirilən II Azərbaycan Beynəlxalq İnvestisiya Forumunda çıxışı zamanı Azərbaycanın iqtisadiyyat naziri Mikayıl Cabbarov bildirib, Trend-in müxbiri xəbər verir.
Nazirin sözlərinə görə, strategiya çərçivəsində prioritet
istiqamətlər sənaye istehsalı və xidmət sahəsi, eləcə də insan
kapitalına investisiyalar olacaq.
Onun sözlərinə görə, strategiya çərçivəsində prioritet istiqamətlər
sənaye istehsalı və xidmət sahəsi, eləcə də insan kapitalına
investisiyalar olacaq.
"Milli iqtisadiyyatın diversifikasiyasının davam etdirilməsi özəl
sektorun rəhbərliyi ilə həyata keçirilməlidir. Sənaye istehsalı və
xidmət sahələrinin inkişafı kimi istiqamətlərə üstünlük verilməli,
eyni zamanda baş verən dəyişikliklərə hazır olmaları üçün insan
kapitalına və insanlara investisiyalara daha çox diqqət
yetirilməlidir", - deyə M.Cabbarov bildirib.
O qeyd edib ki, enerji keçidi və süni intellekt strategiyanın həyata keçirilməsində mühüm rol oynayacaq, o cümlədən iqtisadiyyatın məhsuldarlığının artırılması və əhaliyə dövlət xidmətlərinin göstərilməsinin təkmilləşdirilməsi baxımından.
Nazirin sözlərinə görə, 2030-cu ilədək mühüm istiqamətlərdən
biri uzunmüddətli maliyyələşməyə çıxışın təmin edilməsi və kapital
bazarlarının inkişafı olacaq: "Regional tərəfdaşlıq mühüm əhəmiyyət
daşıyır, çünki strategiyanın vacib hissəsi ixraca yönəlib. Biz öz
daxili bazarımızla məhdudlaşmağa imkan verə bilmərik".
O, Orta Dəhlizin xüsusi rolunu qeyd edərək, onun əhəmiyyətinin
yalnız malların daşınması və tranziti ilə məhdudlaşmadığını
vurğulayıb: "Orta Dəhliz yalnız malların daşınması və ya tranziti
üçün vasitə və marşrut deyil, həm də birgə emal, habların
yaradılması, əlverişli mühitin formalaşdırılması, regionun maliyyə
mərkəzinin və maliyyə resurslarının yaradılması, eləcə də birgə
investisiyalardır".
M.Cabbarovun sözlərinə görə, məhz bu istiqamətlər Azərbaycanın
2030-cu ilədək Milli İnkişaf Strategiyasının məqsədlərinin bir
hissəsidir.
Qeyd edək ki, Bakıda II Azərbaycan Beynəlxalq İnvestisiya Forumu
keçirilir.
İki günlük tədbir Azərbaycanın İqtisadiyyat Nazirliyi və onun tabeliyində olan İxracın və İnvestisiyaların Təşviqi Agentliyi – AZPROMO tərəfindən European House - Ambrosetti şirkətinin strateji tərəfdaşlığı ilə təşkil olunub.
Budəfəki forum "Parçalanmış dünyada etimadın bərpası: Cənubi Qafqaz qlobal qarşılıqlı əlaqələrin və investisiya sabitliyinin dayağı kimi" mövzusuna həsr olunub və dünyanın aparıcı investorlarını, dövlət və hökumət nümayəndələrini, beynəlxalq maliyyə institutlarını və biznes liderlərini bir araya gətirir.
